Okan Burukun başçılığı altında yeni mövsümə hazırlığı davam etdirən ''Qalatasaray'' ikinci transferini rəsmiləşdirib.

Daha öncə ''Konyaspor''dan mərkəz müdafiəçisi Əbdülkərim Bardakçını transfer edən ''Cim-Bom'' bu dəfə ''Altay''dan sol müdafiəçi Kazımcan Karataşı heyətinə qatıb. 19 yaşlı futbolçu ilə beşillik müqavilə imzalanıb. Transfer ''sarı-qırmızılar''a 20 milyon lirəyə başa gəlib. ''Altay''ın öz yetirməsi olan və ötən mövsüm 25 rəsmi oyuna çıxaraq iki məhsuldar ötürmə verən gənc oyunçu yeni klubunda ilk mövsümdə 5 milyon 350 min lirə qazanacaq. Bu məbləğ hər ötən mövsüm 2 milyon lirə artacaq. Bundan başqa, Kazımcana 400 min lirə imza parası ödəniləcək. Türkiyənin U-19 yığmasının üzvü olan bu futbolçu dünən ''Qalatasaray''da ilk məşqinə çıxıb. Qeyd edək ki, dünəndən etibarən İstanbul nəhəngində yığma üzvləri də məşqlərə qoşulub. Amma xüsusi icazəsi olan Markao ilə Kərəm Aktürkoğlu hələ də məşqə başlamayıb. ''Sevilya''ya transfer olunmağın biraddımlığında olan Markaoya danışıqlar aparmaq üçün əlavə vaxt verilib. “Sambaçı” artıq əndəlüslərlə bütün məsələlərdə anlaşıb. Hazırda “Sevilya” ilə “Qalatasaray” arasında danışıqlar gedir.

Bu arada ''Qalatasaray''ın xaricdə keçəcəyi toplanışın tarixi, məkanı və yoxlama matçlarındakı rəqiblərin adları məlum olub. ''Aslan'' iyulun 7-də Avstriyanın Qrats şəhərinə yollanacaq və Bad Valtersdorf qəsəbəsində ayın 19-na qədər toplanış keçəcək. Komanda burda 4 yoxlama oyununda qüvvəsini sınayacaq. Okan Burukun kollektivi iyulun 9-da Avstriya təmsilçisi ''Şturm'', 13-də Macarıstan təmsilçisi ''Fehervar'', 16-da Çexiya təmsilçisi ''Siqma'' və 19-da Çexiyanın daha bir klubu ''Pardubitse'' ilə qarşılaşacaq.