“Sabah”ın “Kəpəz”ə 5 qol vurmasıyla Misli premyer-liqasında həm 9-cu tur, həm də ilk dövrə başa çatdı.

Düzdü, heç də bütün komandalar 9 oyun keçirməyib. “Qarabağ”ın Tovuza səfəri “köhlən atlar”ın avrokuboklardakı çıxışı səbəbindən təxirə salınıb. Buna görə də “Turan Tovuz”la “Qarabağ” başqalarına nisbətən bir oyun az keçirib. Bir görüşü ehtiyatda olan “Qarabağ” onsuz da ilk dövrəni lider kimi tamamlayıb. Qurban Qurbanovun komandası “Sabah”ı 2 xal qabaqlayır və topladığı 24 xal sayəsində özünü lider kürsüsündə rahat hiss edir. “Turan Tovuz” “köhlən atlar”ı məğlub etməyi bacarsa belə, bu qələbə turnir cədvəlində hansısa dəyişikliyə səbəb olmayacaq. 5-ci sıradakı “Qəbələ”nin 15 xalı var, Tovuz təmsilçisi “qırmızı-qaralar”dan 4 xal geridədi. Deməli, “Qarabağ”la görüşün nəticəsindən asılı olmayaraq, “Turan Tovuz” ikinci dövrəyə 6-cı sırada başlayacaq. Elə bu səbəbdən də həmin görüşün nəticəsini gözləmədən ilk dövrə haqda fikirlərimi oxucularla bölüşməyə qərar verdim.

İlk dövrədən sonra komandaların tutduqları yerlər, toplaqdıqları xallar ədalətlidi? Bəlkə də bu suala birmənalı cavab verməklə kiminsə haqqını tapdalamış olardıq. Amma indiki mənzərə, turnir cədvəlindəki sıralama belə narahatlıq üçün əlyeri qoymur. Şəxsi qənaətimdi ki, 10 komandanın 10-u da sıralamadakı yerinə layiqdi, heç kim başqasının yerində “əyləşməyib”. Siz də razılaşarsız ki, hazırkı şəraitdə “Qarabağ”a Azərbaycan çempionatında rəqib yoxdu. Qurban Qurbanov əlinin altındakı heyətdən əla yararlanır. Vacib məqamlarda aparıcı oyunçulara istirahət imkanı yaradan çalışdırıcı komandasını daim formada saxlayır. Xüsusilə də mərkəz müdafiəçiləri həm avrokuboklarda, həm də yerli çempionatda üzərlərinə düşən yükün öhdəsindən layiqincə gəlməyə çalışırlar. Çünki Qurbanov qalan mövqelərdə asanlıqla rotasiyaya əl ata bilsə də, müdafiəçiləri heç də tez-tez dəyişmək imkanına sahib deyil. Xüsusilə də Bəhlul Mustafazadə Kevin Medinanın zədələnməsindən sonra “Qarabağ”ın vazkeçilməz futbolçusuna çevrilib. Bir tərəfdən baxanda bu gənc futbolçu üçn əla fürsət oldu, Mustafazadə etimadı doğrultdu. Əminliklə söyləmək olar ki, ucaboy müdafiəçi son bir ildə “Qarabağ”ın düşərgəsində əməlli-başlı “artırıb”. Keçirdiyi 8 oyunun hamısında qələbə qazanan “Qarabağ” qapısında cəmi 6 top görüb ki, bu göstəriciyə görə də rəqiblərini qabaqlayır. Yeri gəlmişkən, azarkeşlərinə 25 dəfə qol sevinci yaşadan Ağdam təmsilçisi premyer-liqanın ən məhsuldar komandasıdı.

Çoxları “Neftçi”nin “Qarabağ”ın əsas rəqibi olacağını gözləyirdi. “Ağ-qaralar”ın heyətində yetərincə legioner var. Səviyyəli yerli futbolçuların da sayı az deyil. Amma təəssüflə qeyd etməliyik ki, klub rəhbərliyi hələ də məşqçi problemini həll edə bilməyib. “Qarabağ”la görüşdən öncə vətəninə yollanan Laurentsiu Regekampf heç də məsuliyyətli mütəxəssis olmadığını göstərdi. Buxarestdə keçmiş həyat yoldaşına əl qaldırmasıyla gündəmə gələn baş məşqçi övladını xaç suyuna salandan sonra Bakıya qayıtdı. Onun komandaya belə az vaxt ayırmasının nəticəsi özünü son iki oyunda göstərdi. “Qarabağ”a uduzan “Neftçi” doğma meydanda “Turan Tovuz”un da müqavimətini qıra bilmədi. 9 tura 8 xal itirməyə macal tapan “ağ-qaralar” lider “Qarabağ”dan 5, ikinci pillədəki “Sabah”dan isə 3 xal geri qalıb. Özü də şəxsi görüşlərdə “Neftçi” həm “Sabah”a, həm də “Qarabağ”a yenilib ki, bunun özü də xeyli ciddi məqamdı. Görünən odu ki, ölkənin ən qocaman klubu mükafatlar uğrunda yarışan iki əsas rəqibindən təkcə xal fərqinə görə geri qalmır, həm də onlardan zəifdi. İstər məşqçisinin işə məsuliyyətsiz yanaşması səbəbindən olsun, istərsə də heyətdəki nöqsanlara görə. Belə yerdə səbəb nəticəyə heç cür haqq qazandıra bilməz.

“Sabah” “Neftçi”dən qat-qat hazırlıqlı və sabit təsir bağışlayır. Masazır təmsilçisinin sona qədər çempionluq yarışının içində olacağını da gözləməyə dəyər. “Zirə”nin ilk “üçlüy”ə başağrı olacağını da proqnozlaşdırmaq mümkündü. Düzdü, Rəşad Sadıqovun komandası çempionata heç də yaxşı başlamamışdı. Turlar irəlilədikcə bu gərginlik də arxada qaldı, zirəlilər artıq qələbələri sıralayır. Bu məqamda Tovuz səfərindən gətirilən 3 xalın əhəmiyyətini də vurğulamaq lazımdı. “Zirə”nin işləri qaydasına düşdükcə davamını gətirmək də asanlaşır, futbolçular psixoloji gərginlikdən xilas olur. Rəşad Sadıqovun bir müddər əvvəl heyətdən kənarlaşdırdığı futbolçuları bağışlaması da düşərgədəki yaxşı əhval-ruhiyyənin göstəricisidi. Xüsusilə də Təmkin Xəlilzadənin formasını bərpa etdikdən sonra komandasına fayda verəcəyini söyləmək olar. “Zirə” qədər olmasa da, “Qəbələ”nin də mükafatçılar sırasına düşmək şansı var. O da həqiqətdi ki, “qırmızı-qaralar” qışda güclənməlidi.

“Qəbələ” ilə bağlı maraqlı məqam odu ki, Elmar Baxşıyevin komandası ilk dövrədə heç-heçə etməyib, güzəştsiz mübarizə ilə diqqəti çəkib.
Etiraf etməliyik ki, qalan komandaların yuxarı sıralardakı mübarizəyə müdaxilə edəcəyi heç də inandırıcı deyil. “Sumqayıt”, 9 legionerinə rəğmən, elitanın ən bərbad komandasıdı. “Kəpəz”lə “Şamaxı”nın da səviyyəsi bəllidi. “Səbail” hər nə qədər “bərk qoz” təsiri bağışlasa da, qeyri-sabit və “dişsiz” komanda olmağın əziyyətini çəkir. “Turan Tovuz” isə “autsayderlər qrupu”nun ən səviyyəlisidi. Amma tovuzluların 6-cı pillədən yuxarı boylanacağına inanmağım gəlmir. Bir sözlə, 9 turdan sonra hamı layiq olduğu yerdədi.

AMAL