Yığmamız üçün daha bir macəra başa çatdı. Canni de Byazinin komandası Millətlər Liqasını yenə uğursuz başa vurdu.

Qazaxıstan, Slovakiya və Belarusun da yer aldığı qrupda 2-ci olduq. Hamı burda favorit kimi slovakları görürdü. Pley-off görüşlərindən qrupumuza vəsiqə qazanan Qazaxıstanın liderliyi həqiqətən də sürpriz oldu. Startdan əvvəl Belarus autsayder sayılırdı. Bu komandadan maksimum xal alan kollektiv qrupun lideri olacaqdı. Qazaxıstandan 4, Slovakiyadan alınacaq 3 xal hər şey həll edəcəkdi.

C liqasının 3-cü qrupunda favorit sayılan üç kollektivin hər biri ilk oyunları səbirsizliklə gözləyirdi. Qrupun taleyi də elə burda həll olundu. Astanadakı görüşdə millimiz hücum futbolu sərgiləsə də, yekunda məğlub oldu. Növbəti matç isə Serbiyada Belarusa qarşı idi. De Byazinin komandası, bütün cəhdlərə baxmayaraq, fərqlənə bilmədi. Bu görüşlərdən sonra da yığmamızın şansı qalırdı. Slovakiya ilə qarşılaşmada əldə olunacaq 3 xal liderlik üçün bəs edəcəkdi. Lakin De Byazinin lazımsız gedişləri nəinki qələbə qazanmağa, uduzmağımıza səbəb oldu. Halbuki Belarus da lider Qazaxıstanı büdrətmişdi - 1:1.

Yenə də şansımız qalırdı, amma hər şey öz əlimizdə deyildi. Biz Belarusu evdə, slovaklar isə səfərdə qazaxları udmalı və ya heç-heçə etməliydi. De Byazinin komandası qələbə qazandı, amma... Qazaxlar da boş dayanmadı. Ardıcıl iki görüşdə 6 xal toplayan Məhəmməd Adıyevin komandası pley-offa vəsiqəni rəsmiləşdirdi. Biz isə sonda 10 xalla ikinci olduq.
Düzdü, De Byazinin rəhbərlik etdiyi kollektiv təsnifat mərhələsində tarixində ilk dəfə ardıcıl 3 görüşdə qələbəyə sevindi. Amma bunların hamısı faydasızdı. Çünki qrup liderliyi əlimizdən çıxdı. Ümid evdə 3:0 hesabı ilə məğlub etdiyimiz Qazaxıstan, vaxtilə udduğumuz Farer adalarına uduzan Türkiyə, eyni ildə müstəqil olduğumuz Gürcüstan və ya Yunanıstandan ikisinin Avropa çempionatının seçmə mərhələsində qrup ikincisi olmağa qalıb. Biz də onların yerinə pley-offda oynayaq. Niyə? Çünki De Byazi ilk 3 görüşdə 5-li müdafiə sistemindən istifadə edərək ardıcıl 3 görüşdə 9 xal hədəfi ilə baxdığımız rəqibləri üstələyə bilmədi. Slovakiya ilə Bakıdakı oyunda Renat Dadaşovun əvəzinə Abbas Hüseynovun meydana çıxması fiaskosundan heç danışmıram.
İndi bəziləri deyir ki, De Byazi qalsın. Nə üçün? Hansı səbəbdən? Zəif qrupda 1-ci ola bilmədiyimizə görə? İtaliyalı mütəxəssis Slovakiya ilə oyundan sonra demişdi ki, Riçard Almeydadan üzr istəməliyəm. Onu milliyə çağırmadığım üçün. Məncə, italiyalı səhv edir. Millətlər Liqasının 3 görüşündə mənasız gedişləri ucbatından itirdiyimiz xallara görə əvvəlcə futbolçulardan, daha sonra AFFA rəhbərliyindən və ən əsası da Azərbaycan futbol ictimaiyyətindən üzr istəyib, sağollaşmalıdı!

İLKİN SULTANLI