Qutyerresin hərəkətinin sirri 12 ildən sonra açıldı
“Trabzonspor” fanatları yəqin Teofilo Qutyerresi gözəl xatırlayır.
Football-plus.az xəbər verir ki, kolumbiyalı forvardın hazırda 37 yaşı var və o, “Deportivo Kali”nin şərəfini qoruyur.
İllər öncə isə, daha dəqiq desək, 2009/10 mövsümünün qış fasiləsində Qutyerresin yolu Türkiyəyə düşmüşdü. O vaxt 24 yaşlı forvard “Atletiko Junior”dan “Trabzonspor”a transfer olunmuşdu. Onun Türkiyə macərası çox da uğurlu keçməmişdi. İlk 5 ayda qol vura bilməyən Qutyerres 2010-un avqustunda “Bursaspor”a qarşı superkubok matçında het-trik etmiş və yavaş-yavaş Türkiyəyə uyğunlaşmağa başlamışdı. Amma elə həmin ilin oktyabrında bu futbolçu qəribə şəkildə başını götürərək Türkiyədən qaçdı. Özü də müqaviləsi davam edə-edə! Sonradan adlı-sanlı klublarda oynayan və hətta 2015-də “River Pleyt”in heyətində Libertadores kubokunun qalibi də olan Qutyerresin Türkiyədən bu müəmmalı qaçışının səbəbi uzun müddət sirr kimi qaldı. Amma həmin illərdə “Trabzonspor”un aparıcı müdafiəçilərindən olan Giray Kaçar bu sirrin üstünü açıb. 2008-12-ci illərdə trabzonluların şərəfini qorumuş Kaçar “Haber61” saytına açıqlamasında bunları deyib:
“Bir dəfə bir matçın final fitindən sonra hamımız paltardəyişmə otağına yollandıq. Teofilo bir neçə epizodda komanda yoldaşlarına ötürmə verməmişdi. Əsəblər tarıma çəkildi və bəzi olaylar yaşandı. Komandanın içində olan iki futbolçu Teofilonu tutub paltardəyişmə otağındakı şkafa tərəf itələdilər. Yəni adamı rəsmən şkafın içinə soxdular! Bu hadisə üzündən həvəsdən çox düşdü və motivasiyası itdi. Bir müddət sonra isə ölkəni tərk etdiyini öyrəndik”.
Qeyd edək ki, Qutyerres həmin mövsüm Argentinaya yollanaraq “Rasinq”lə müqavilə imzaladı və ikinci dövrəni bu klubda keçirdi. “Trabzonspor” isə “Rasinq”dən FİFA-ya şikayət etdi. İdman Arbitraj Məhkəməsinə qədər uzanan bu məsələnin sonunda qaradənizlilər 400 min avro kompensasiya qazandılar. Qutyerres “Trabzonspor”da ümumilikdə 24 rəsmi oyuna çıxaraq 8 qol vurdu.
