Tolqay Arslan derbidə kimi favorit görür?
“Udineze”nin yarımmüdafiəçisi Tolqay Arslan “A Spor” kanalına açıqlamalar verib.
Football-plus.az xəbər verir ki, həm “Beşiktaş”ın, həm də “Fənərbaxça”nın şərəfini qorumuş 32 yaşlı yarımmüdafiəçi həftəsonu bu komandalar arasında keçiriləcək derbi ilə bağlı fikirlərini bölüşüb. Bundan başqa Arslan 2018-də “Beşiktaş”da forma geyərkən bir matçın fasiləsində lavaş dönəri yeməsi barədə uzun müddətdi gəzən şayiələri növbəti dəfə təkzib edib:
“Udineze”də 3-cü mövsümümü keçirirəm. Şəhərə və İtaliya futboluna tam uyğunlaşdığımı deyə bilərəm. Mövsümə çox yaxşı başlamışıq və belə də davam etmək istəyirik. Türkiyə futbolunu izləyirəm. “Fənərbaxça” çox yaxşı heyət yığıb və bu mövsüm baxımlı futbol sərgiləyir. İki komandanın da şərəfini qoruduğum üçün istərdim ki, derbi bərabərliklə bitsin. Amma real danışsaq, “Fənər”in qalib gələcəyini düşünürəm. “Fənərbaxça”nın heyətində “Beşiktaş”a qarşı səfərdə keçirdiyim oyun karyeramın ən çətin oyunu olmuşdu. Çünki “Beşiktaş”dan ayrılandan bir neçə ay sonra yenidən o stadiona qayıtmalı olmuşdum. Fanatların çox böyük etirazı ilə üzləşmişdim. “Beşiktaş”da bir matçın fasiləsində dönər yeməyimlə bağlı şayiə yayılmışdı. Kaş həqiqətən də yeyərdim. Axı bir qədər məntiqlə düşünsək, dönərin paltardəyişmə otağında nə işi var? Buna heç kim icazə verməzdi. Bu söhbət yayılarkən də mənə maraqlı olan məhz bu idi. Ümumiyyətlə, “Beşiktaş”dakı son aylarım çətin keçdi. Ayrılandan sonra da bəzi lazımsız ifadələr işlətdim. İmkanım olsa, o sözlərimi dəyişərdim. Yəni mənim də səhvlərim oldu. Amma ümumi götürəndə 4 mövsümlük “Beşiktaş” karyeramda unudulmaz anlarım çox oldu. Ən gözəl qolumu, təbii ki, “Liverpul”a vurdum. 2 çempionluq yaşadım. Komandada gözəl ab-hava var idi. “Beşiktaş” mənə çox şey verdi və daim qəlbimdə xüsusi yerə malik olacaq. Fürsət düşsə, ora qayıtmaq istərdimmi? Fanatlar əfv etsə, əlbəttə, bir gün qayıtmaq istəyərəm. Amma indi Türkiyəyə qayıtmaq planım yoxdu. Çünki İtaliyada xoşbəxtəm”.
Digər xəbərlər
