''Trabzonspor'' heyəti gücləndirmək yönündə çalışmalarını davam etdirir.

Son çempion bu yay hələ ki ötən mövsüm heyətdə olan Stefano Densvili daimi əsasda transfer edibsə, Ərən Elmalı, Doğucan Haspolat və Yans Strüger-Larsen kimi yeni futbolçuları da komandaya cəlb edib. Entoni Nvakaeme kimi önəmli silahı əldən verən Trabzon təmsilçisi onun boşluğunu Trezeqe kimi tanınan Mahmud Əhməd İbrahim Həssənlə doldurmaq niyyətindədi. Türkiyə mətbuatının yazdığına inansaq, ''Trabzonspor'' uzun müddətdi apardığı danışıqlardan sonra həm misirli futbolçunun özü, həm də onun müqavilə ilə məxsus olduğu ''Aston Villa'' ilə anlaşma əldə edib. Baş məşqçi Abdulla Avcı Trezeqenin transferini rəhbərlikdən xüsusi olaraq tələb edib və onun arzusu reallaşmaq üzrədi.

Bu keçidin qısa müddət ərzində açıqlanması gözlənilir. Maddi detallara gəlincə, 27 yaşlı futbolçu illik 2,2 milyon avro məvacib tələb edirdi. Amma ''Trabzonspor''da illik məvacibdə belə desək, tavan var və heç kim 1,5 milyon avrodan artıq qazanmır. Bu üzdən Trezeqeyə Marek Hamşikdə olduğu kimi 1,5 milyon avro ilə yanaşı 700 min avro da bonus paketi təklif olunub.

Qeyd edək ki, daha öncə Türkiyədə 2 mövsüm (2017/18, 2018/19) ''Kasımpaşa''nın şərəfini qoruyan futbolçu 2019-da 10 milyon avro qarşılığında ''Aston Villa''ya transfer olunmuşdu. İngiltərə klubunda heyətə düşməkdə çətinlik çəkən və bir qədər gözdən düşən Trezeqe ötən mövsümün qış fasiləsində icarə əsasında ''İstanbul BŞ''yə keçmişdi. O, bu klubun heyətində 13 superliqa matçında 6 qol, 4 məhsuldar ötürmə ilə fərqlənərək yenidən Türkiyə klublarının diqqətini cəlb etməyi bacarmışdı. Amma ''Trabzonspor''un Trezeqeni icarə əsasında, yoxsa daimi əsasda transfer edəcəyi barədə məlumat yoxdu. Misirli vingerin birmingemlilərlə 2023-cü ilə qədər müqaviləsi var.