Srağagün ''Trabzonspor'' fanatlarını şoka salan olay yaşandı.

Belə ki, komandanın əsas qol silahı Andreas Korneliusun Trabzonda xoşbəxt olmadığı və ayrılmaq istədiyi iddia olundu. Təcrübəli futbolçunun meneceri dərhal onun sabiq klubu ''Kopenhagen''lə danışıqlara başladı və bu transfer faktiki 24 saat ərzində başa çatdı! Dünən ''Trabzonspor'' Korneliusun 6 milyon avro qarşılığında ''Kopenhagen''ə satıldığını rəsmən açıqladı. Başqa sözlə desək, Danimarka çempionu qısa müddət ərzində Türkiyə çempionuna ikinci zərbəni vurdu. Xatırladaq ki, 28 yaşlı forvard ''Trabzonspor''a ötən ilin avqustunda 4,9 milyon avroya ''Parma''dan transfer olunmuşdu. Danimarkalı forvard bu birillik dönəm ərzində iz buraxaraq fanatların sevimlisinə çevrilmişdi. Ötən mövsüm superliqada 37 oyuna vurduğu 15 qolla çempionluqda mühüm pay sahibi olmuşdu. Kornelius cari ''futbol ili''nə də yaxşı başlayaraq həm superkubokda vacib qollar vurmuş, həm də çempionatda mövsümün ilk qolunun müəllifi olmuşdu.

Ümumilikdə Kornelius Trabzon macərasına biri çempionluq, biri superkubok olmaqla 2 titul sığışdırdı və 49 rəsmi oyuna 20 qol vurdu. Bununla da ''Trabzonspor'' ötən mövsümün iki ən məhsuldar oyunçusu Nvakaeme ilə Korneliusu itirmiş oldu!