Bu həftə avrokuboklarda 3-cü təsnifat mərhələsinin ilk oyunları keçiriləcək.

Məlum olduğu kimi, ötən həftə "Sabah"ı çıxsaq, başqa təmsilçilərimiz üçün düşərli olmadı. Daha doğrusu, Masazır təmsilçisi Çempionlar Liqasında mərhələ adlamaqla həm də Konfrans Liqasının liqa mərhələsinə vəsiqə qazandısa, "Qarabağ" Avropa, "Neftçi" ilə "Zirə" Konfrans Liqasında mübarizəni dayandırdı. Beləliklə, artıq avrokuboklarda cəmi iki təmsilçimiz - "bayquşlar"la "köhlən atlar" qalıb. Düzdü, bu həftənin klublarımız üçün nə dərəcədə uğurlu olacağı sual altındadı. Lakin ümidimiz diri, inamımız tamdı!

Əvvəlcədən bildirək ki, "Orhus" - "Sabah" oyununu İctimai Televiziyası, "Dinamo" - "Qarabağ" matçını isə "CBC Sport" canlı yayınlayacaq.

Çempionlar Liqası
3-cü təsnifat mərhələsi, ilk oyun
Orhus (Danimarka) - Sabah
Hakimlər: RADE OBRENOVİÇ, Aleksandar Kasapoviç, Qreqa Kordej, Martin Matoşa (hamısı Sloveniya).
5 avqust. Randers, "Randers" stadionu. Saat 20.30.

"Sabah" öz Yolunda sözün əsl mənasında inamla irəliləyir. Çempion ilk iki təsnifat mərhələsini 4 qələbə ilə başa vurub. Həmin oyunlarda 7 qol vuran "bayquşlar" qapısında cəmi bir top görüb. Belədə Masazır təmsilçisinin həm də balanslı hücum və müdafiə xəttinin olduğunu da düşünmək mümkündü. Ancaq hələ "Sabah"ın potensialından ağızdolusu danışmağa dəyməz. Çünki ilk rəqiblər olan "Nyu Seynts"lə KuPS-un səviyyəsi təmsilçimizlə müqayisədə aşağı idi və bunu matçlarda da gördük. Növbəti sədd isə daha möhkəmdi. Söhbət "Orhus"dan gedir ki, bu komandaya yuxarıdan aşağı baxmaq olmaz! Azı ona görə ki, əvvəlki mərhələnin ilk oyununda "Lex"ə 1:4 hesabıyla uduzan Danimarka çempionu səfərdə əsl futbol şousu göstərdi və nadir hallarda qeydə alınan nəticəyə imza atdı: polşalılara əsas vaxtda qalib gələn (3:0), əlavə vaxtda "sülh"ə (1:1) razı olsa da, penalti seriyasında daha dəqiq olan kollektiv məqsədinə çatdı. Odu ki, "Orhus"u nəinki ciddiyə almaqda, hətta ilk oyunun nəticəsindən asılı olmayaraq, arxayınlaşmamaqda fayda var!

"Orhus"u tanıyırıq. Daha doğrusu, rəqib haqda ətraflı məlumat vermişdik. “Ağlar” avqustun 1-də Danimarka çempionatında meydana çıxıb. 2-ci tur matçında "Lünqbü"nün qonağı olan komanda xal itirib - 2:2. İlk tur qarşılaşmasında da "sülh"ə razılaşan (1:1) "ağlar" hazırda 2 xalla 6-cı sıradadı.

Konfrans Liqası
3-cü təsnifat mərhələsi, ilk oyun
Dinamo (Kiyev, Ukrayna) - Qarabağ
Hakimlər: MORTEN KROQ, Şteffen Bramsen, Viktor Skite, Yakob Karlsen (hamısı Danimarka).
6 avqust. Lyublin, "Lyublin Arena". Saat 21.00.

Avropa Liqasının 2-ci təsnifat mərhələsində ÇSKA ilə qarşılaşan "Qarabağ" nəinki azarkeşlərini, bütün futbol ictimaiyyətini məyus etdi. Sofiya təmsilçisi ilə evdə qolsuz "sülh"ə razılaşan "köhlən atlar" səfərdə də həmin aqibətlə üzləşdi. Qalibin adı əlavə vaxtda da bəlli olmadığından penalti seriyasına şahidlik etdiyimiz görüş rəqibin daha dəqiq olması üzündən ağdamlıların məğlubiyyəti ilə nəticələndi. Beləliklə, "Qarabağ" sonuncu dəfə 2023-cü ildə mübarizə apardığı Konfrans Liqasına düşdü. Vitse-çempionu burda Kiyev "Dinamo"su ilə iki çətin oyun gözləyir  Bəli-bəli, Qurban Qurbanovun komandasının işi bu mərhələdə həqiqətən də asan olmayacaq. Azı ona görə ki, rəqib də bura Avropa Liqasından gəlib. İlk mərhələdə "Universitatya Kluj"u mübarizədən kənarlaşdıran kiyevlilər növbəti mərhələdə PAOK-la bacarmayıb. Düzdü, Ukrayna mətbuatında yayılan bilgilərə görə, kollektiv hələ də həmin uğursuzluğun psixoloji təsirlərindən xilas ola bilməyib. Ancaq "Dinamo"nun aparıcı futbolçularından Roman Salenkonun bugünlərdə verdiyi açıqlamada "Qarabağ"ı keçməkdən danışması bizi daha diqqətli olmağa vadar edir.

Ukrayna çempionatında yeni mövsüm başlamasa da, “Dinamo”nun ilk turdakı oyunu məhz avrokuboka görə təxirə salınıb.

KƏNAN BAHADIR