Kamal Quliyev: “Əvvəllər elə bir oyunçu millinin heç qapısından baxa bilməzdi” – AÇIQLAMA
Misli premyer-liqasında ilk 3 tur arxada qaldı.
İki yeni komandanın da iştirakı ilə keçirilən çempionatda “Qəbələ” və “Sabah” şərikli liderdi. Son turda “Qəbələ” “Kəpəz”i 3:0, “Sabah” isə “Neftçi”ni 2:1 hesabı ilə məğlub etdi. Liderlərdən “Qarabağ”ın Çempionlar Liqasının pley-off matçına görə “Turan Tovuz”la matçı isə təxirə salınıb.
Çempionatın ilk 3 turundan sonra cari mövsümün necə keçdiyi, komandaların çıxışı barədə mütəxəssis rəyi öyrəndik. Kamal Quliyev “Football-plus.az” saytına bunları söylədi: “Mənim üçün adın heç bir fərqi yoxdu. “Qarabağ” da, “Sumqayıt” da bizimdi. Sadıcı, başa düşmürəm, “Kəpəz”i niyə premyer-liqaya buraxdılar. Əlbəttə, “Kəpəz” Gəncədə, “Turan Tovuz” Tovuzda möhtəşəm olacaq. Bu şəhəri hansı səbəbə görə futbolsuz qoyursuz? Stadion ola bilər, ona da 1 milyondan artıq pul qoyuldu. Kimin üçün təmir etdirdiz oranı? O stadionda futbol adına bir şey yoxdusa, nəyə lazımdı? O ki qaldı çempionatın oyunlarına, məndən inciməsinlər, səviyyə ildən ilə düşür. Burda yalnız “Qarabağ”ı istisna edə bilərəm. Bir də “Sabah” bu siyahıya əlavə oluna bilər. “Neftçi”nin yeni legionerləri var. İki metrdən qapıya düşə bilmirlərsə, kimə lazımdılar? Sizi əmin edirəm ki, futboldan iyrənmişəm. Neçə illər ərzində hamı inkişaf etdi, biz niyə bunu bacarmadıq? Dövlətimiz nə qədər pul ayırdı. Niyə bir futbolçu yetişdirib Avropaya göndərə bilmədik? Eddi İsrafilovu parka gəzməyə gətiriblər? Millinin oyunçusudu. Əvvəllər elə bir oyunçu millinin heç qapısından baxa bilməzdi. Kimlərsə üçün yaxşı futbolçu ola bilər. Amma bizim kimi futbolçuların heç sağ ayağının tayı deyil. Hər yoldan keçəni “Neftçi”yə gətirirlər. 8 il bu klubun şərəfini qorumuşam, çörəyini yemişəm. Adama çox pis təsir edir. Ancaq “Qarabağ”ın oyununa baxıram. Bir də “Sabah” xoşuma gəlir. Hiss olunur ki, komandanın məqsədi var, yaxşı oyun qura bilirlər. Düşünülmüş kombinasiyaları var. Mən bu komandaya da dəfələrlə “əhsən” deyirəm. Rəhbərliklərinə də demək istəyirəm ki, məşqçinin işinə qarışmasınlar”.
ŞAİR ABDULLA
