Azərbaycan futbolu ötən həftə qitə arenasında yara aldı, iki itki verdi.

“Zirə” və “Qəbələ” sıradan çıxdı, əyləci birdəfəlik basdı. Əslində gözlənilən sonluq idi. İlk görüşlərdə qeydə alınan nəticələrdən sonra ümidimizi yalnız möcüzəyə bağlamışdıq. Amma olmadı. Bunun da obyektiv və subyektiv səbəbləri var ki, hamıya bəlli detalları yenidən xırdalamağa ehtiyac görmürəm.

Konfrans Liqasındakı üçüncü təmsilçimiz “Neftçi” isə möhtəşəm geridönüşlə futbolsevərlərə həzz dəqiqələri yaşatdı. Böyük həyəcanın sonu Azərbaycanı sevincə boğdu. Əslində rəqibin səviyyəsini nəzərə alaraq flaqmanın mərhələ keçəcəyini təxmin etmişdim. Gözləmədiyim “Neftçi”nin məzmunsuz oyun sərgiləməsi idi. 180 dəqiqə ərzində meydanda dişə vurulacaq çox az şey gördüm. Futbolçular sonadək döyüşdü və komanda bəzi fiqurların fərdi ustalığı hesabına mərhələ adladı. Amma təbii ki, bu yetərli deyil və Laurentsiu Regekampf “Rapid”lə görüşlər üçün nələrsə fikirləşməlidi.

Hazırkı “Neftçi”, möhtəşəm geridönüşə baxmayaraq, çoxsaylı tərifləri və təşəkkürü də haqq etmir. Açığı, məni həm də belə mənzərə ilə üzləşməyim təəccübləndirdi. Əziz dostlar və həmkarlar, “Aris”i mübarizədən kənarlaşdırmaq komandanın boynunun borcu idi. Belə deyək, “ağ-qaralar” böyük bir biabırçılığın astanasından döndü. Axı bir mərhələ adlamaq “Neftçi” kimi böyük klub üçün nə vaxtdan uğur sayılıb? Bunun adı kiçik təsəllidi. Hədəf isə yalnız qrup mərhələsi olmalıdı!

Cari mövsümdə böyük həyəcanın təməlini qoyan “Qarabağ” da azarkeşlərə həzz dəqiqələri yaşatmaqda davam edir. Öncə Ramin Musayevin “loxladığı” “Lex”ə, ardınca “Sürix”ə qarşı oyunlarda yaşananlar çətin ki, uzun müddət yaddaşlardan silinsin. Necə deyərlər, böyük turnirlərin həyəcanı da, həzzi də böyük olur.

Ardıcıl 9-cu dəfə qrupda oynamağı təmin edən “köhlən atlar” növbəti ciddi sınaqla üz-üzədi. Məlum itkiləri də nəzərə alsaq, komandanın “Ferentsvaroş”la duellərdə çətinlik çəkəcəyi şübhə doğurmur. Amma ona da inanıram ki, Qurban Qurbanov vəziyyətdən çıxmaq üçün variantlar fikirləşib. Artıq “Qarabağ”ı ÇL-in pley-offundan bir addım ayırır. Büdrəməyək bu mərhələdə! Stanislav Çerçesovu dağ başına qaldıran, “Ferentsvaroş”u “Qarabağ”dan üstün sayan özündənrazı rusiyalı mütəxəssisləri susduraq, göydən-yerə vuraq. Axı “köhlən atlar” bundan da ciddi sınaqlardan alnıaçıq, üzüağ çıxıb. Bu dəfə niyə olmasın?!

Əziz azarkeşlər, növbəti böyük həyəcana və həzz dəqiqələrinə hazırsız? Hazırsızsa, axın edin tribunalara, komandanı 90 dəqiqə daha çılğın şəkildə dəstəkləyin. Qoy səsiniz və hayqırtıınız Azərbaycanın şimal sərhədlərini aşsın!

KƏNAN HƏSƏNOV