Regekampf "Neftçi"nin bu probleminə görə narahatdı - AÇIQLAMA
"Neftçi"nin baş məşqçisi Laurentsiu Regekampf Türkiyənin Bolu bölgəsindəki təlim-məşq toplanışında "Qaziantep"a qolsuz heç-heçə etdikləri yoxlama oyunu barədə danışıb.
47 yaşlı mütəxəssis təlim-məşq toplanışını da dəyərləndirib:
"Bizim üçün yaxşı oyun oldu. Amma qol vura bilmədik. Burda topla o qədər də çox işləyə bilmədik. Əsas tapşırıq komandanı hazırlaşdırmaqdan ibarət idi. Oyunçuların bəziləri bizə gec qoşulmuşdu. 3 yoxlama qarşılaşmasından sonra komandada zədəli futbolçunun olmaması yaxşı haldı. Hazırlıq prosesini zədəsiz başa vurduq".
Rumıniyalı baş məşqçi hazırlıq prosesindən razı qaldığını söyləyib:
"Komandanı Konfrans Liqasındakı oyuna hazırlaşdırmaq üçün bir həftəmiz var. Qol vurmaq problemini həll etməliyik. Futbolçularla bu yöndə söhbətlər edirik. Mənim üçün komanda oyunu önəmlidi. Bunun üçün də bizə vaxt lazımdı".
Mütəxəssis yeni transferlərin uyğunlaşmaq üçün bir az da zamana ehtiyaclarının olduğunu diqqətə çatdırıb:
"Onları hələlik tam hazır görmürəm. Amma bilirəm ki, hər biri keyfiyyətli oyunçudur. Tam formalarını bərpa etdikdən sonra komandaya köməkləri dəyəcək. Hər üç qolkiper haqqında yalnız pozitiv danışa bilərəm. Hər biri üzərində çox çalışır. Qarşıdakı mövsüm üçün bizim çox yaxşı qapıçılarımız var".
