İyulun 27-də “Qalatasaray” İtaliya təmsilçisi “Salernitana” ilə gücünü sınayırdı.

Hər iki komanda yeni mövsümün hazırlığını Avstriyada davam etdirir. Elə bizim “Qarabağ” kimi. Məlum səbəblərdən “Qarabağ” üçün yeni mövsüm tez başlayıb. Ona görə də təmsilçimiz Alp dağlarının ətəklərini bir müddət əvvəl tərk edib. İtalyanlarla türklər kimi Avropanın bir çox aparıcı klubları hazırda Avstriyadadı və bir-birləri ilə qüvvələrini sınayır, zəif nöqtələri müəyyənləşdirirlər. “Qalatasaray”ın “Salernitana” ilə qarşılaşması da elə bu məqsədə xidmət edirdi. Yoxlama görüşlərinin xarakterinə uyğun keçən qarşılaşma 1:1 hesabıyla yekunlaşdı, tərəflər meydandan “sülh”lə ayrıldı. Bu matçdan söz açmağım heç də nəticəyə görə deyil.

Diqqətimi “Qalatasaray”ın baş məşqçisi Okan Burukun oyundan sonra türkiyəli jurnalistlərə verdiyi açıqlamalar çəkdi. Bu yazını yazmaq həvəsinə də məhz o açıqlamalara qulaq asandan sonra düşdüm.

Okan Buruk jurnalistlərin suallarını cavablayarkən transfer çalışmalarına da toxundu. Çalışdırıcı heç də hər istədikləri futbolçunu rənglərinə bağlaya bilmədiklərindən şikayətləndi. Özü də bunun səbəbini təxminən belə izah etdi: “Məsələ heç də pulda deyil. Bəzi futbolçular var ki, heç məbləği müzakirə etmirlər də. Onlar üçün Avropanın aşağı səviyyəli çempionatlarında, ortabab klublarda oynamaq daha cəlbedicidi, nəinki Türkiyəyə gəlmək. Ona görə də “Qalatasaray”ın heyətini gücləndirməyə, istədiyimiz futbolçuları heyətimizə cəlb etməyə çətinlik çəkirik. Əllərimizi yanımıza salmamışıq, axtarışlarımız davam edir. İnanıram ki, lazımi mövqeləri gücləndirmək üçün futbolçu tapacağıq”. Düzdü, Okan bəyin dedikərini tam əzbərləyib, sözbəsöz tərcümə etməmişəm. Amma gənc mütəxəssisin söylədiklərinin canı məhz belə idi. Mən də çalışdım ki, bunu siz dəyərli oxucularımıza çatdırım.

Əminəm ki, “Qalatasaray”ın baş məşqçisinin sözləri sizə heç də yad deyil. Çoxumuza bu şikayətlər tanışdı. Bəli, elə “Qarabağ”ın baş məşqçisi Qurban Qurbanov da, eyni zamanda Ağdam klubunun rəhbərliyi də tez-tez belə şikayətlər səsləndirir. Biz isə inanmaq istəmirik ki, onun sözləri həqiqətdi, “Qarabağ” həqiqətən də transfer etmək istəyir, amma heç də hər futbolçunu razı salmaq olmur. İndi özünüz də görürsüz ki, bu cür şikayətləri edən təkcə Qurban Qurbanov deyil. “Qarabağ”la “Qalatasaray”ın büdcəsi arasında heç müqayisə aparmaq mümkün deyil. İstanbul klubunun azarkeşləri mövsüm başlamamış biletlərini alır, klubun fan-şopuna az qala hər ayın başında gedirlər. Əllərindən gələn qədər kluba maddi dəstək göstərməyə, “sarı-qırmızılar”ın uğurunda pay sahibi olmağa çalışırlar. Hələ mən “Qalatasaray”ın sponsorluq anlaşmalarını demirəm. Bütün tanınmış markalar “Cim-Bom”la tərəfdaş olmaqda maraqlıdı, bunun üçün yaxşı pul da xərcləməyə hazırdılar. Teleyayından gələn gəlirləri də unutmayaq. Artıq Türkiyədə belə bir ənənə formalaşıb, Superliqanın hər bir iştirakçısı ümumi “hovuz”dan özünə çatacaq məbləği alır. Bizim klublar isə “CBC Sport” yarananda boş vədlər eşitdilər, vəssalam.

Bütün bu məqamları ona görə sadalayıram ki, “Qalatasaray”la “Qarabağ”ın gəlirləri, maddi imkanları arasındakı fantastik fərqi hamımız gözümüzün önündə canlandıra bilək. Üstəlik, “Qalatasaray” Avropada yetərincə tanınmış klubdu. UEFA Kubokunun qalibi olan “sarı-qırmızılar”ın heyətində vaxtilə braziliyalı Taffareldən tutmuş rumın Hacıya qədər məşhur futbolçular forma geyinib. Elə klubun özünün Hakan Şükür, Arif Ərdəm, Əmrə, Arda kimi yetirmələri olub. Bununla belə, bugünkü şərtlər başqadı. O boyda “Qalatasaray”ın baş məşqçisi komandasını gücləndirmək üçün istədiyi futbolçuları transfer edə bilmir. Özü də lazım olan məbləği ödəməyə razı ola-ola.

Biz isə neçə ildi “Qarabağ”ı, onun rəhbərliyini və sponsorlarını, baş məşqçi Qurban Qurbanovu qınayırıq. Guya ki, adamlar pul xərcləmək istəmir, yaxşı transferlər etmirlər. Daha demirik ki, o legionerlər bizim boş tribunalar önündə keçirilən çempionatımıza gəlməkdə maraqlı deyil. Biri deyir, “Qarabağ” 10 milyonluq hücumçu alsın, o biri deyir, 5 milyonluq qapıçı lazımdı. “Qarabağ” artıq böyüyüb, məhdud imkanlarla Avropanın tanınmış klublarına meydan oxuyur. Bəlkə biz də “Qarabağ”la birlikdə böyüyək?!

AMAL