Nəhayət, Jül Kundenin növbəti mövsümə harda başlayacağı məlum olub. Xidmətində iki klubun maraqlı olduğu fransız futbolçu artıq “Barselona”nın sıralarındadı.
"Football-plus.az" xəbər verir ki, İspaniya nəhəngi “Sevilya”nın oyunçusunun transferini yekunlaşdırıb. Bu haqda Kataloniya klubunun saytı məlumat yayıb. Bəzi mənbələr 23 yaşlı müdafiəçinin “Barselona”ya 50 milyon avroya satıldığını, müqavilədə “Sevilya”ya bonus kimi daha 5 milyon avro çata biləcəyini xəbər verib. Kundenin yeni klubu ilə tibbi müayinədən keçdikdən sonra 5 illik müqavilə imzalayacağı açıqlanıb. O, “Sevilya”da 2019-cu ildən oynayırdı.
Fransa millisinin də üzvü olan Jülün niyə “Çelsi”ni yox, “Barselona”nı seçdiyi də məlum olub. COPE radiostansiyasının jurnalisti Elena Kondis Edo onun İspaniya klubuna idman meyarlarını nəzərə alaraq üstünlük verdiyini açıqlayıb. Gənc futbolçu komandaların baş məşqçiləri Tomas Tuxel və Xavi Ernandes ilə danışıq aparandan sonra kataloniyalıların layihəsinin onu daha çox qane etdiyinə əmin olub. “Sevilya”nın idman direktoru Monçi isə “Çelsi”nin təklifinə niyə mənfi cavab verdiklərini belə izah edib: “Son bir ayda “Çelsi” bizimlə danışıq aparmışdı, ötən cümə axşamı futbolçu ilə bu kluba satılacağıyla bağlı şifahi razılaşma da əldə olunmuşdu. Lakin keçid rəsmiləşən ərəfədə İngiltərə klubunda onlara məhz Kunde tipli müdafiəçi lazım olub-olmamasıyla bağlı şübhələr yarandı. Bazar günü danışıqlar prosesi düyünə düşdü. Londonlular əla təklif etdikləri oyunçunun transferi məsələsində bizdən bir qədər gözləməyi xahiş etdilər. Gözləmə mövqeyində olarkən “Barselona”dan yeni təklif aldıq. Bu klubun ilk təklifi bizi qane etməmişdi. Amma bu dəfə onların irəli sürdüyü məbləğə razılaşdıq. Çünki yeni təklif klubumuzun tarixində rekord göstəricidi. Bundan sonra “Çelsi” bizimlə yenidən təmas qurdu, ancaq artıq “Barselona”nın təklifini qəbul etmişdik. Onu da deyim ki, Jülü sıralarına böyük sevinclə qoşulacağı kluba satmışıq”.
Səbəbkar isə keçidini belə dəyərləndirib: “İndi “Barselona”da olmağımın əsas səbəblərindən biri Xavi ilə bağlıdı. Onunla bir neçə dəfə danışmışam. Məşqçinin haqqımda dedikləri isə məni ovsunlamışdı. Aramızda səmimi və xoş söhbətlər olub. Biz futbola eyni gözlə baxırıq. Qarşıma heç bir məhdudiyyət qoymuram. Mən öyrənmək və inkişaf etmək istəyirəm. Buna görə məşqçini dinləyəcək və imkanlarım çərçivəsində hər şey edəcəyəm”.