“Mançester Yunayted” yenidən qalmaqalın mərkəzindədi.

İş ondadı ki, klubun icraçı direktoru Riçard Arnoldun fanatlarla ünsiyyət zamanı dediyi fikirlərin səsyazısı sosial şəbəkələrə sızıb. Arnold orda ötən mövsümü “faciəvi” adlandırır və yersiz transfer xərclərini etiraf edir.

Səsyazısı hardandı? Bu nə görüşdü?

Fevralın 1-də Ed Vudvordun yerini tutan Arnolda ötən şənbə azarkeşlərin onun Çeşirdəki evinin yanında aksiya keçirməyə hazırlaşmasıyla bağlı informasiya çatıb. Narazılığın səbəblərinə gəlincə, azarkeşlər transfer bazarındakı lənglikdən və MY-nin sahiblərindən, Qlyzer ailəsindən şikayətlənir.

Etiraz aksiyasının təşkilatçısı rolunda “1958” adlanan fanat hərəkatını 12 üzvü çıxış edib (bu qrup apreldə - “Norviç”lə ev oyunu ərəfəsində də aksiya keçirmişdi). Aksiya hazırlığından xəbər tutan Arnold üzbəüz danışmaq üçün yerli paba yollanıb. Görüşdə iştirak edənlər söhbəti yazaraq sonra da internetə qoyublar.

“Sadəcə, bir topa pulu yandırdıq”

İngiltərə tabloidləri Arnoldun görüşdəki etiraflarınə böyük sivinclə ayrı-ayrı sitatlara ayırıbılar.

• “Lənətə gəlmiş kabus. Hər dəqiqəsinə nifrət edirəm” – “Mançester Yunayted”in yeni icraçı direktoru komandanın 6-cı yerdə və çempion “Mançester Siti”dən 35 xal geridə bitirdiyi 2021/22 mövsümünü fanatlarla görüşdə belə xarakterizə edib.

• “Cəhənnəm olsun, biz, sadəcə, bir topa pulu yandırdıq. Avropada futbolçulara hamıdan çox, milyard funt xərcləmişik. İndiki vəziyyətimizdən məmnun deyiləm. Bu vəziyyət qətiyyən xoşuma gəlmir. Bunu araşdırmalıyıq. Sadəcə, məşq bazasına gedib, “göstərin, bizim milyard hardadı” demək olmaz. Düşünürəm ki, tarixən əlimizdəki vəsaiti yaxşı xərcləmirik. Böyük məbləği çölə atmışıq” – çox güman, Arnold belə deməklə sələfi Vudvorda söz atır. Əvvəlki icraçı direktor transferdəki yanlışlara görə onsuz da hamılıqla tənqid olunur.

• “Tranfer etmək istədiyimiz pullar baxımından pul həlledici amil deyil. Baş məşqçi De Yonqu istəyir, menecerlər də bu yöndə böyük iş görüb. O, əla futbolçudu. 100 milyon? 200? Bilmirəm. Kimi istəyirsiz, transfer edin. İstəyirsiz ki, mən özüm futbolçu alım? Sövdələşməni başa çatdırmaq üçün mümkün olan hər şeyi edirik. Artıq neçə gündü bu işlə məşğulam. Pul baxımından problem yoxdu, ancaq bəzi əngəllər var ki, onları sizə deyə bilmərəm. Qulaq asın, De Yonqu almaq üçün hər şey edirik və sizə deyirəm ki, zəruri vəsaitimiz var” – bu da Arnoldun klubu bazarda süstlükdə və “Barselona” ilə Frenki de Yonqun transferini ləngitməkdə suçlayanlara cavabındandı. Yeni baş məşqçi Erik ten Haq niderlandlı yarımmüdafiəçinin yolunu səbirsizliklə gözləyir.

• “Pul hardansa daxil olmalıdı. Qleyzeyzerlər ailəsi xoşunuza gəlməyə bilər. Ancaq bir başqasının gəlməsini istəyirsizsə, onlar da görməlidilər ki, azarkeşlər klubu və komandanı sevir” – Qlyezerləri müdafiə etmək üçün deyilən replikalardandı.

• Armold fanatlarla görüşdə onu da deyib ki, paltardəyişmə otağından iki xəbər ötürücüsü klubu tərk edib. İcraçı direktor konkret ad çəkməsə də, hər halda, yayda komandanı tərk edən 6 oyunçunu – Pol Poqba, Cessi Linqard, Edinson Kavani, Nemanya Matiç, Xuan Mata, Li Qrant – göz önünə gətirib, hansısa nəticələrə gəlmək olar.

• “Gənc oyunçularımıza baxın. AÇ-dən sonra pis günləri oldu. Reşford, Sanço... Bütün təhqirlərdən sonra çətin mövsüm keçirdilər. Onların özünəinamının sarsılmasına təəccüblənmirəm”.

MY necəsə reaksiya verdi?

Bazar günü klub adından belə bəyanat yayıldı:

“Mançester Yunayted”in gözlənilməz müdafiəçisi də tapılıb. “Liverpul”un sabiq oyunçusu Ceymi Karrager Arnoldun videosunun sosial şəbəkələrə sızmasını qətiyyən bəyənməyib:

“Klubun top əməkdaşları ilə birbaşa ünsiyyət saxlamağın mümkünsüzlüyündən gileylənən hər azarkeşə demək istəyirəm ki, belə görüşlərin alınmamasının səbəbi bax budu”.

MY necə xərcləyir – həqiqətən “pul topasını yandırır”?

Arnoldun fikirlərini çatdırma formasını dartışmaq olar. Ancaq yuxarıda qoyulan sualın sadə cavabı “bəli”di. Bəzi qaynaqlar komanda martda Çempionlar Liqasının 1/8 finalında “Atletiko”ya uduzandan sonra “Mançester Yunayted”in transferlərə nə qədər pul xərclədiyini hesablamağa çalışıb. Hesablama nöqtəsi kimi klubun turnirdə sonuncu dəfə uğur qazandığı 2011-dən bəri olan dövr götürülüb. İndi rəqəmə baxın: MY 2011-dəki finaldan sonra transferlərə 1341,1 milyon funt xərcləyib.

Əsas rəqiblər “at oynadır”, amma MY tələsmir

Premyer-liqada “transfer pəncərəsi” yalnız iyunun 10-da açılıb, ancaq azarkeşlər əsəbləşməkdədi. Rəqiblərin fəallığı onları özündən çıxarır: “Mançester Siti” Erlinq Holannı gətirib, “Liverpul” Darvin Nunyeslə anlaşıb, “Tottenhem” Antonio Konte üçün heyət yığır (İvan Perişiç, İv Bissuma). “Mançester Yunayted” isə yalnız müqavilə müddəti bitən futbolçuların gedişi haqda xəbər verib.

“Sky Sports”un yaydığı xəbərə görə, MY əvvəllər Ten Haq ilə bağlı olan futbolçuların transferi üzərində fəal şəkildə çalışır. Poqba, Matiç və Matanın gedişindən sonra yarımmüdafiənin mərkəzi prioritetə çevrilib. Frenki de Yonqa görə “Barselona” ilə danışıqlar davam edir. Kataloniyalılar ona 80 milyon avro qiymət qoyub, ancaq onların maliyyə problemindən xəbərdar olan “Yunayted” qiymətin aşağı salınacağına ümid edir. Bundan başqa, Frenki özü hazırda yığma oyunlarından sonra istirahətdədi. “Yunayted” “Ayaks”ın vingeri Antoni ilə müdafiəçisi Yurrien Timberin də xidmətində maraqlıdı. Ancaq burda məsələ heç də sadə deyil: Niderland yığmasının baş məşqçisi Lui van Qal klubunda müntəzəm oynamasa, müdafiəçini DÇ-yə aparmayacağını deyəndən sonra transfer qəlizləşib. Deyilənə görə, Timber belə aqibətlə üzləşməmək üçün “Ayaks”da qalmaq fikrindədi.

Daha bir potensial hədəf “Brentfor”dakı yarım ildə top səviyyəyə qayıdan Kristian Eriksendi. Danimarkalı yaxın günlərdə gələcəyinə dair qərar verməlidi.

ORXAN