Türkiyə çempionatının 24-cü turunda zirvədə xal fərqi 4-ə yüksəldi və sona 10 tur qalmış ''Qalatasaray'' inamla liderliyini davam etdirir.

"Football-plus.az" xəbər verir ki, ''Cim-Bom''un ''may ayları bizimdi'' şüarı belə görünür, bu mövsüm də reallığa çevriləcək.

Statistikaya inansaq, İstanbul nəhənginin çempionluq şansı 100 faizdi! Belə ki, Türkiyə çempionatı 3 xallıq sistemlə keçirilməyə başlandığı 1987-ci ildən bu yana ''Qalatasaray'' 13 dəfə son 10 tura lider kimi daxil olub və bu mövsümlərin hamısında sonda çempionluq sevinci yaşayıb!

Elə Okan Burukun son 3 mövsümdəki dönəminin hər birində də komanda son 10 tura lider kimi daxil olub və yekunda da fanatlarını sevindirib. Düzdü, ''Qalatasaray''ın təqvimi ''Fənərbaxça'' ilə müqayisədə daha çətindi. Amma ''Fənər'' asan təqvimə rəğmən son iki turda iddiasız rəqiblərə qarşı yersiz xallar itirməklə sanki özü əzəli rəqibinin işini asanlaşdırır.

''Qalatasaray'' son 10 turda da zirvəni əldən verməsə, ardıcıl 4-cü, tarixinin 26-cı çempionluğunu qazanacaq. Okan Buruk isə Fatih Terimin ardından ardıcıl 4 il çempion olmuş ikinci məşqçi kimi adını Türkiyə futbolu tarixinə yazdıracaq. Terim 1996-2000-ci illərdə ''Qalatasaray''ın başında bu sevinci yaşayıb.