Digər milli çempionatlardakı kimi Türkiyə superliqasında da tədricən mövsüm başa çatır.

Çempionluq mübarizəsinin kuliminasiya nöqtəsinə elə də çox vaxt qalmayıb. Son turda, bilindiyi kimi, 2-ci pillədəki “Fənərbaxça” yenə önəmli xallar itirdi. Lider “Qalatasaray” isə “İstanbul BŞ”ni minimal hesabla məğlub edərək sona 5 tur qalmış xal fərqini 5-ə çatdırdı.

İş elə gətirib ki, son turda həm “Qalatasaray”, həm də “Fənərbaxça” çempionatdan çəkilən klublar – uyğun olaraq “Hatayspor” və “Qaziantep” ilə qarşılaşmalıdı. Ona görə sondan əvvəlki – 37-ci tur İstanbul nəhəngləri üçün sonuncu olacaq. Yenə də iş elə gətirib ki, sondan əvvəlki turda məhz elə “Qalatasaray”la “Fənərbaxça” üz-üzə gələcək.

Bəribaşdan deyək ki, “Aslan” qarşıdakı 3 turda uyğun olaraq səfərdə “İstanbulspor”u, evdə “Sivasspor”u, səfərdə “Ankaragücü”nü yenəcəyi təqdirdə çempionluğunu rəsmiləşdirəcək və evdəki derbiyə bu statusda çıxacaq. Çünki ardıcıl 3 qələbə ilə komanda xalını 82-yə yüksəldəcək. Son turdakı texniki qələbə sayəsində bu xal 85-ə çatacaq. Belədə hazırda 68 xalı olan “Fənərbaxça” qalan 5 matçın hamısından qələbə ilə ayrılsa belə, maksimum 83 xal toplayacaq və əzəli rəqibini yaxalaya bilməyəcək.

İlk baxışdan intriqa davam edir və hətta “Fənər”lə eyni xala malik olan, amma bir oyun artıq keçirən 3-cü pillədəki “Beşiktaş”ın da riyazi cəhətdən çempionluq şansı var. Amma turnirin tarixinə nəzər salsaq, indidən “Cim-Bom”u çempionluq münasibəti ilə təbrik etmək olar.

Məsələ burasındadı ki, Türkiyə çempionatı 3 xallıq sistemlə keçirildiyi 1987/88-dən bu yana “sarı-qırmızılar” son 5 tura lider kimi daxil olduğu 10 mövsümün hər birində çempionluq yaşayıb. Bu 10 mövsümün 4-də sona 5 tur qalmış ən yaxın izləyici ilə xal fərqi ən azı 5-ə bərabər olub. Yəni əsas rəqibləri “Fənərbaxça” və “Beşiktaş”dan fərqli “Qalatasaray”ın son 5 tura lider kimi daxil olub çempionluğu əldən verdiyi mövsüm yoxdu! Hələ bu harasıdı?!

İstanbul nəhəngi 1987-dən bu yana son 5 tura eyni xalla və ya maksimum 2-3 xal geridə daxil olduğu 5 mövsümdə də çempionluq sevinci yaşayıb. Yəni məsələyə tarixi aspektdən baxanda artıq iş həll olunub…

"Football-plus.az"