“Qalatasaray”la “Fənərbaxça”nın amansız çempionluq mübarizəsinə səhnə olan Türkiyə çempionatının cari mövsümündə artıq 28 tur arxada qalıb.

Yəni mövsümün bitməsinə cəmi 10 tur qalıb. İki komanda birlikdə son 9 turda keçirdikləri 18 oyunun yalnız ikisində xal itiriblər! Hər iki halda “Fənər” büdrəyib. 25-ci turda “sarı-lacivərdlilər”in evdə “Alanyaspor”u yenə bilməməsindən sonra “Qalatasaray” liderliyi ələ keçirdi. Hələ həmin vaxt son 13 turdakı nəticələrə görə “sarı-qırmızılar”ın çempionluq şansı 80 idi. Aradan 3 həftə keçib və hər iki kollektiv bu 3 turu itkisiz başa vurub. Yəni artıq son 10 turun nəticələrinə baxmaq lazımdı. Statistika isə onu göstərir ki, “Cim-Bom”un çempionluğuna yalnız möcüzə mane ola bilər. Belə ki, Türkiyə çempionatı 3 xallıq sistemlə keçirilməyə başlandığı 1987/88-dən bəri “Qalatasaray” son 10 tura lider kimi daxil olduğu 11 mövsümün hamısında (!) sonda çempion olub. Hələ bu harasıdı?! Liderliyi bir kənara qoyaq. “Qalatasaray” bu müddətdə hətta son 10 tura 2-ci pillədə də daxil olduğu 5 mövsümün hamısında (!!!) çempion olub. Yəni bu statistikaya görə komandanın bu mövsüm çempionluq şansı 100 faizə bərabərdi!

Təqvim də “Aslan”ın xeyrinədi. Komanda qarşıdakı 10 turda birbaşa rəqibi olan “Fənərbaxça”dan başqa heç bir nəhənglə qarşılaşmayacaq. “Fənərbaxça”nı isə 30-cu turda çətin Trabzon səfəri, 34-cü turda evdə “Beşiktaş”la derbi gözləyir. Bundan başqa, “Qalatasaray” qarşıdakı 10 turun yalnız 3-də İstanbuldan kənara çıxacaq. Belə ki, komanda səfərdə “Adana Dəmirspor”, “Alanyaspor” və “Konyaspor” ilə qarşılaşacaq. Digər 2 səfər oyunu İstanbul təmsilçilərinə - “Kasımpaşa” və “Fatih Karagümrük”ə qarşı olacaq. Düzdü, bir məqam “Cim-Bom” fanatlarını narahat etməyə bilməz. İlk dövrənin son 10 turuna nəzər salsaq, komanda həmin müddətdə 30 mümkün xaldan yalnız 23-nü qazanmışdı! “Hatayspor”a məğlubiyyət, eləcə də “Sivasspor” və “Fənərbaxça” ilə heç-heçələr məhz bu dönəmə təsadüf etmişdi. Amma digər tərəfdən “Qalatasaray” bu xal itkilərinin hamısını səfər oyunlarında yaşamışdı. Bu dəfə son çempion bu rəqiblərin hamısını evdə qəbul edəcək. Öz meydanında isə komanda Türkiyə çempionatında 10 aydan çoxdu xal itirmir!