Premyer-liqada yay “transfer pəncərəsi” açıqdı. Odu ki, klublar heyətini gücləndirməkdə davam edir.

Hadisələrin axarı legioner limitinin ləğvindən sonra komandaların əcnəbi futbolçulara marağının böyük ölçüdə artdığını göstərir. Hətta iş o həddə çatıb ki, maliyyə sarıdan güclü dayaqları olan klublar yerli futbolçularla danışıq aparmağa belə vaxt sərf etmək istəmir. Düzdü, həmin kollektivlərin hədəflərini, azarkeş tələbini nəzərə alsaq, bu cür strategiyanı dəstəkləməkdən başqa çarə qalmır. Ancaq məhdud büdcə ilə premyer-liqada qalmaq uğrunda mübarizə aparacağı gözlənilən klublar belə imkan daxilində legioner futbolçu alır.

Bəs, əsas çempionatımıza ən çox hansı ölkələrdən futbolçu gəlir? Yazıda məhz bu suala cavab tapacağıq.

6 legionerlə güclənən “Sabah” onları Cənubi Afrika, Fransa, Portuqaliya, Sloveniya, Nigeriya və İsrail klublarından transfer edib. “Qarabağ” 8 əcnəbi futbolçu alıb. “Köhlən atlar” Cənubi Kipr və Macarıstanın hərəsindən iki, Portuqaliya, Rusiya, İspaniya və Xorvatiya komandalarının hərəsindən bir oyunçu ilə güclənib. “Turan Tovuz” heyətinə cəlb etdiyi iki legionerdən birini Rusiyadan, digərini Fransadan tapıb. “Neftçi” dörd əcnəbi oyunçu ilə razılığa gəlib. Onların son iş yerləri Portuqaliya, İtaliya, Yunanıstan və İsrail klubları olub. “Zirə” də fərqli ölkələrdə axtarış edib. Sonda Portuqaliya, Cənubi Kipr, BƏƏ və Serbiya kimi ölkələrin hərəsindən bir futbolçu alınıb. “Qartallar”ın mövsümlərarası fasilədə Kot-d'İvuardan olan Kris Diqbeu ilə də gücləndiyini xatırladaq. Sadəcə, həmin anlaşma futbolçunun karyerasında ilk peşəkar müqavilə olub. “Araz-Naxçıvan” yeddi əcnəbi oyunçu ilə razılığa gəlib. Bunlardan üçü İndoneziya, ikisi Cənubi Kipr, qalanları Dominika və Taylanddan alınıb. “Sumqayıt” heyətinə Ukrayna və Portuqaliya klublarının hərəsindən bir futbolçu cəlb edib. 5 legionerlə güclənən “Şamaxı” onlardan üçünü Portuqaliyadan, qalanlarını İsrail, BƏƏ və Gürcüstandan gətirib. “İmişli” və “Kəpəz” hərəyə bir legioner alıb. “Pələnglər” Portuqaliya, “sarı-göylər” Avstriya klubundan transfer edib. “Qəbələ”nin aldığı beş legionerin hamısı fərqli ölkələrdən – Malta, Sloveniya, Macarıstan və Portuqaliyadan təşrif buyurub. Nəhayət, “Şəfa” səkkiz əcnəbi futbolçu transfer edib. Rumıniya və Şimali Makedoniyanın hərəsindən iki legoner alan bakılılar qalanlarını Niderland, İsveçrə, Gürcüstan və Kosovo klublarında tapıb.

Beləliklə, premyer-liqa klubları Portuqaliyadan 11, Cənubi Kiprdən 5, İsrail, Macarıstan və İndoneziyanın hərəsindən 3, Fransa, Rusiya, Rumıniya, Şimali Makedoniya, BƏƏ və Gürcüstanın hərəsindən 2, Cənubi Afrika, Sloveniya, İspaniya, Xorvatiya, İtaliya, Yunanıstan, Serbiya, Dominika, Tayland, Ukrayna, Avstriya, Malta, Sloveniya, Niderland, Nigeriya, İsveçrə və Kosovo klublarının hərəsindən isə 1 legioner alıb. Diqbeunun Kot d'İvuardan gəldiyini unutmasaq, elita iştirakçıları 29 ölkədən nə az, nə çox - 55 futbolçu alıb.

“Sumqayıt”ın Ukrayna “Polesye”sindən transfer etdiyi Emil Mustafayevin azərbaycanlı olduğunu nəzərə alsaq, deməliyik ki, premyer-liqamıza yayda xarici ölkələrdən 54 legioner gəlib!

Qeyd edək ki, “Kəpəz” Kennet Kalunqanı “Mingəçevir”dən, “İmişli” Yvan Senini “Şimal”dan alıb. Yazı əsas çempionatımıza yalnız xarici ölkələrdən gələn futbolçuları əhatə etdiyindən həmin oyunçular hesaba qatılmayıb.

KƏNAN BAHADIR