''Fənərbaxça'' ''Qalatasaray''la amansız çempionluq mübarizəsini davam etdirir.

''Football-plus.az'' xəbər verir ki, Joze Mourinyonun komandası son turda səfərdə ''Sivasspor''u məğlub edərək 3 xallıq fərqin artmasına imkan vermədi. Anadolu klublarına qarşı uduzmayan, ən pis halda bu rəqiblərlə görüşdə heç-heçə oynayan İstanbul nəhəngi son illərdə əsas problemi iddialı klublarla oyunlarda yaşayır.

Maraqlıdı ki, hələlik Mourinyo da bu problemə çarə tapa bilmir. Ən diqqətçəkən fakt odu ki, ''Fənərbaxça''nın Türkiyə çempionatı çərçivəsində son 7 məğlubiyyətinin hamısı güclü rəqiblər, yəni ''Qalatasaray'', ''Beşiktaş'' və ''Trabzonspor''la oyunlarda qeydə alınıb! Bu mövsüm ''sarı-lacivərdlilər'' superliqada hər iki məğlubiyyəti ''Qalatasaray'' və ''Beşiktaş''a qarşı derbilərdə yaşayıb. Ötən mövsüm komandanın yeganə məğlubiyyəti evdə ''Trabzonspor''la görüşdə qeydə alındı.

Siyahını bir qədər də uzatsaq və 2022/23-ə nəzər salsaq, ''Fənərbaxça'' 37-ci turda səfərdə ''Qalatasaray''a (0:3), 27-ci turda evdə ''Beşiktaş''a (2:4), 18-ci turda evdə ''Qalatasaray''a (0:3) və 15-ci turda səfərdə ''Trabzonspor''a (0:2) boyun əyib. Bu mövsüm ''Fənər'' ''Göztəpə'' (2:2), ''Samsunspor'' (2:2, 0:0), ''Eyüpspor'' (1:1) kimi klublarla oyunlarda da xallar itirib. Amma onlara uduzmayıb.

Cüzi irəliləyiş kimi Mourinyonun komandasının ''Trabzonspor''a qarşı uğurlu nəticələrini qeyd etmək olar. Belə ki, bu mövsüm trabzonlularla hər iki oyunda qələbə əldə olundu. Amma İstanbul nəhənglərinə qarşı eyni uğuru sərgiləmək mümkün olmayıb. Hətta ''Fənər'' kubokda da uğursuzluğa düçar olaraq tarixində ilk dəfə bir mövsümdə iki dəfə ''Qalatasaray''a evdə uduzub!

Hazırda komanda superliqada 3 oyunluq qələbə, 15 oyunluq məğlubiyyətsiz seriyaya malikdi. Maraq üçün bildirək ki, ''Fənər'' qalan 7 tur ərzində böyük klublardan yalnız ''Beşiktaş''la qarşılaşacaq.