Acun Ilıcalının tabeliyinə keçdikdən sonra ''Hall Siti'' hər yay olduğu kimi bu yay da Türkiyədə toplanış keçir.

Acunun dönəmində ilk dəfə premyer-liqaya vəsiqə qazanan ''pələnglər'' avqustun 1-də superliqa təmsilçisi ''Kasımpaşa'' ilə üz-üzə gəliblər. Oyun ''Rəcəp Tayyib Ərdoğan'' stadionunda keçirilib.

Qeyd edək ki, superliqanın ortabablarından sayılan ''Kasımpaşa''nı Əmrə Belözoğlu çalışdırır. İlk yarısı qolsuz başa çatan oyunda əsas hadisələr ikinci hissəyə təsadüf etdi. Fasilədən dərhal sonra Ben Uanes Güvən Yalçının ötürməsini qola çevirərək ''Kasımpaşa''nı önə keçirdi. Ancaq ingilislərin cavabı gecikmədi. Bu qolda ''Hall Siti''nin türkiyəli legioneri Abdulakdir Ömürün də əməyi oldu. Məhz onun asmasından sonra komandanın əsas qol silahı Oliver Makberni hesabı bərabərləşdirdi. Qalan müddətdə başqa qol olmadı və oyun 1:1-lik bərabərliklə yekunlaşdı.

Acun Ilıcalı ilə ''Kasımpaşa'' başqanı Davut Dişli oyunu yanbayan əyləşərək izlədilər. Bundan başqa oyunu izləyənlər arasında ''Qalatasaray'' və Rumıniya futbolunun əfsanəsi George Hacinin də yer alması diqqət çəkdi. Acun fasilədə və oyundan sonra futbolsevərlərə imza paylayaraq onlarla şəkil çəkdirdi. Daha öncə ''Konyaspor''u 3:0, ''Çaykur Rizəspor''u 2:1 yenən ''Hall Siti''nin Türkiyədə nəzərdə tutulmuş oyunları başa çatdı.

Sergey Yakiroviçin çalışdırdığı komanda qarşıdakı günlərdə Almaniyaya yollanacaq. Avqustun 8-də ''Ayntraxt''la oyun nəzərə tutulub. ''Sarı-qaralar'' mövsümöncəsi son hazırlıq oyununu isə avqustun 12-də doğma fanatları önündə ''Nitsa''ya qarşı keçirəcək.