Okan Burukun dönəmində Türkiyə futbolunda rekordları sanki yenidən yazan ''Qalatasaray'' daha iki rekordu yeniləməyə hazırlaşır.

"Football-plus.az" xəbər verir ki, həftə öncə tarixinin 25-ci çempionluğunu qazanan ''Cim-Bom'' son turda evdə ''İstanbul BŞ''ni qəbul edəcək.

Hazırda komanda prinsipial rəqiblərdən ''Fənərbaxça''dan 11, ''Beşiktaş''dan 33, ''Trabzonspor''dan 44 xal öndədi. Yəni bu rəqiblərlə ümumilikdə fərq 88 xala bərabərdi. Son turda bu fərq ən azı 85 olsa, ''Qalatasaray'' çempionatın yeni rekordunu müəyyənləşdirmiş olacaq. Ötən mövsüm ''sarı-qırmızılar'' bu 3 prinsipial rəqibə ümumilikdə 84 xallıq fərq ataraq rekord qırmışdı.

Bundan başqa ''Qalatasaray'' son turu 3 xalla bitirsə və ''Fənərbaxça'' ''Konyaspor''la ev oyununda büdrəsə, fərq 13 xala yüksələcək. Bu, turnirin tarixində çempion komanda ilə ən yaxın izləyicisi arasında ən böyük xal fərqi olacaq. Hazırda bu göstəricidə də rekord ''Qalatasaray''ın özünə məxsusdu. Amma İstanbul nəhəngi bu rekordu hələ 37 il öncə müəyyənləşdirib.

Belə ki, 1987/88-də çempion ''Qalatasaray'' ən yaxın rəqibi ''Beşiktaş''dan 12 xal artıq toplamışdı.