“Ümid edirəm ki, yeni mövsümün startına qədər məsələ müsbət həll olunacaq və “Səbail” “Quba” adı ilə çıxış edəcək. Stadion məsələsi ilə bağlı da hazırda bir neçə variant üzərində işləyirik. Quba stadionu ilə bağlı danışıqlar aparılır. Bu prosesdə AFFA ilə də müzakirələr davam edir. Məsələ müsbət həllini tapsa, klub fəaliyyətini orada davam etdirəcək. Əks halda, qarşıdakı mövsümdə ev oyunlarımızı Bakıda keçirəcəyik. Paralel olaraq paytaxtda stadion axtarışını davam etdiririk. Lakin qeyd etdiyim kimi, əsas istəyimiz növbəti mövsümdən etibarən “Quba” adı altında fəaliyyət göstərməkdi”.

"Son beş ildə Azərbaycan futbolunda çoxlu faciə yaşamışam. Fizikada bir qanun var, Nyutonun 3-cü qanunu: hər təsirə bir əks təsir var. Görünür, bizim yaxşı niyyətimizə, zəhmətimizə və səbrimizə qarşı da hər dəfə yeni bir zərbə gəlib. Bu xəbər də həmin zərbələrin növbətisidi. Bu, sanki domino effektidi. Bir faciə bitməmiş digəri başlayır. Bu qədər çətinlik içində olan bir kluba münasibətdə bunu eləmək yaraşarmı?! “Quba” adı ilə çıxış etmək istəyirlərsə, buyursunlar. Kaş ki, məqsəd həqiqətən Quba futbolunun inkişafı olaydı. Amma təəssüf ki, mən buna inanmıram. Gün gələcək, bu məsələnin əsl mahiyyətini bütün ictimaiyyət biləcək. Bilməsələr belə, zamanı gələndə hər şeyi mən özüm danışacağam. Bu günə qədər susmuşuq. Bu susqunluq nə qorxudan olub, nə də çəkinməkdən. Sadəcə, bəzi insanların xətrinə, bəzi dəyərlərə hörmət etdiyimiz üçün danışmamışıq. Amma görünür, bunu zəiflik kimi qəbul ediblər. Bu sükutumuzdan istifadə edib, həqiqətə uyğun olmayan açıqlamalar verirlər. Guya komandanı hansısa fantastik qiymətə onlara təklif etmişik və sair. Bunların heç biri həqiqəti əks etdirmir.
Adam öz-özünə bir sual verir: bir adın arxasında dayanan zəhməti bu qədər asan silmək olarmı? İki il ərzində bu klubu yaşatmaq üçün çəkilən əziyyət, gecə-gündüz verilən mübarizə, tökülən tər, yaşanan çətinliklər bir qərarla yox sayıla bilərmi? Bu klub üçün öz cibindən pul xərcləyən, sağlamlığını, əsəblərini, ailəsinə ayıracağı vaxtı bu yolda sərf edən insanların haqqı necə olacaq? Futbolçuların haqqı necə olacaq? Məşqçilərin haqqı necə olacaq? Ən əsası, komandanın ən çətin günündə belə tribunaları tərk etməyən, yağışda da, soyuqda da arxamızda dayanan azarkeşlərin haqqını kim verəcək?

Futbolçuların axşam yeməyi üçün qapılar döyürdük. "Uşaqlar, heç olmasa, gəlib sizin restoranda bir tikə çörək yesin", - deyə xahiş etdiyimiz insanlar var idi. O gün bizi qapıdan geri qaytaranların bu gün Quba adına sahib çıxmağa çalışması, əlbəttə, düşündürücüdü.

Bir atalar sözü var: "Alma məzlumun ahını, çıxar ahəstə-ahəstə". Mən heç kimə qarğış etmirəm. Sadəcə, həyatın dəyişməyən bir qanunu var: insan nə əkirsə, gec-tez onu da biçir.

Quba adı heç kimin şəxsi mülkü deyil. Bu ad kabinetlərdə yaranmayıb. Bu ad insanların sevgisi, əziyyəti, göz yaşı və alın təri ilə formalaşıb. Adı sənədlərdə dəyişmək mümkündü, amma onun tarixini, ruhunu və insanların yaddaşındakı yerini dəyişmək mümkün deyil. Artıq 8-9 aydı klubda qərar verən şəxs deyiləm. Klubun idarə heyəti var və qərarları onlar verir. Mən onların adından danışa bilmərəm”.