Misli premyer-liqasının 16-cı turunda “Qarabağ” “Qəbələ”ni səfərdə məğlub etdi - 2:1. “Football-plus.az” xəbər verir ki, oyunsonrası mətbuat konfransında “köhlən atlar”ın baş məşqçisi Qurban Qurbanov media önünə çıxıb.
- Futbolçularımı təbrik edirəm. Vacib 3 xal qazandıq. Zədəsiz bitirdik, şükürlər olsun. Mikrozədələr var. Oyundan çox futbolçuları düşünürdüm. 3 xal tam yerinə düşdü. “Qəbələ”yə uğurlar arzulayıram. Bütün oyunlarda yaxşı mübarizə aparırlar. Daha çoxuna layiqdilər. Kaxaberin planları həmişə mənə maraqlı olur. Azarkeşlərə təşəkkür edirəm. Yaxşı atmosfer var idi. Sizlərə təşəkkür edirəm ki, bu il yanımızda olduz.
- Duran tez-tez sürüşürdü. Meydançanın vəziyyətinə görə idi, yoxsa butsunda problem var idi?
- Tək Duran yox, çox futbolçu sürüşürdü (gülür). Amma Duran daha çox. Sonradan meydana daxil olanda hazırlıq istənilən səviyyədə olmur. Hava da təsir etdi.
- 2025-i necə dəyərləndirirsiz?
- Çox yaxşı. Narazılıqlar da oldu. Kollektivin içindəyəm. Nələr oldu bilirəm. Elə mövqedəyik ki, hamı bizdən razı olmalıdı. Çox sıx il keçdi. ÇL-in çəkisi daha yuxarıdı. Daha çox güc sərf etdik. Təzyiqə futbolçularım dözdüsə, ayaqüstə qala bildilərsə, çox razıyam. ÇL-də qələbələrimiz əks-səda doğurdu.
- “Futbol+”in “ilin futbolçusu” sorğusunda namizədlər arasında “Qarabağ”ın dörd futbolçusu var. Siz kimə səs verəcəksiz?
- (xeyli düşünür). Düşünməmişəm. Elədi ki, hamısından çox razı da qalmışam, narazı da. Bəhlul daha sabit oldu. Toral Elvindən bir qədər az oynadı. Nəriman da yaxşı başladı. Zədədən sonra bir az formadan düşdü.
- Juninyo yeni komandası ilə müqavilə imzaladı. Bu haqda nə düşünürsüz? Siz də danışıqlar aparırdız?
- Qaytarmaq real görünmürdü. Ciddi danışıq olmadı. Mən “Sevilya”ya getməsinin tərəfdarıydım. Məncə, orda daha rahat oynaya bilərdi. Daha yaxşı futbolçu ola bilərdi. Amma seçimi bu idi.
- Bikalyonun adı “Botafoqo” ilə hallanır…
- Nə olur-olsun, bu, “Qarabağ”dı, uşaq baxçası deyil. Gələn təkliflər ciddi olmalıdı. Futbolçuların fikrini yayındırırlar. Ağıllarına gələn tərzdə danışırlar. Futbolda küçə danışığı olmalı deyil.
- Menecerləri nəzərdə tutursuz?
- Həm menecer, həm rəhbərlər. Futbolçuların da “başı gedir”. Pulsuz, 3 manat, 5 manat təklif… Pul bunların - istənilən insanın gözünü örtür. O qədər lazımsız, keyfiyyətsiz təkliflər olur. Futbolçular tələsir, fikrini futbola cəmləyə bilmir. Yaxşı kollektiv üçün gərək avrokubok oynamayaq. Ancaq Azərbaycanda oynayaq. Bu dəqiqə komandanı saxlamaqda çətinlik çəkirəm.
- Yankoviç də təklif alıb?
- 90 faizinə təklif gəlib. Yaponiyadan, Dubaydan zəng gəlir. Qeyri-ciddi şəkildə danışırlar.
MÜZƏFFƏR QULUZADƏ