"Qarabağ" Misli premyer-liqasının 25-ci turu çərçivəsində "Sumqayıt"ın meydanından qalib ayrıldı - 2:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Çox vacib qələbə qazandıq. "Sumqayıt"a uğurlar arzulayıram. Sona qədər yaxşı mübarizə apardılar. Soyuq havada stadiona gələn bütün azarkeşlərə təşəkkür edirəm.

- Heyətlə bağlı planlarınız hansı yöndədi? İndidən növbəti mövsümü düşünürsüz?
- Hələ çempionat davam edir. Futbolçular çox istəkli çalışırlar, hər biri əsas heyətə düşmək istəyir. Bəzən rotasiyalar edirik. Vacib olan qarşıdakı oyundu. Növbəti mövsümü düşündüyümü desəm, yalan danışaram.

- Rəhbərliyiniz altında oynamış futbolçular baş məşqçi kimi sizə rəqib olanda hansı hissləri keçirirsiz? Artıq bu halla bir neçə dəfə qarşılaşmısız.
- Təbii ki, çox xoşdu. Biz də hansısa məşqçilərin futbolçusu olmuşuq və onlara qarşı oynamışıq. Hər birinə uğurlar arzulayıram. Onları görəndə keçmiş günlərimizi xatırlayıram. Bir də görürsən hansısa epizod yada düşür. Bütün futbolçular məşqçi olmur. Hamısının uğuruna sevinirəm.