Çempionlar Liqasının pley-off mərhələsinin cavab oyunları çərçivəsində "Qarabağ"ın qonağı olacaq "Ferentsvaroş"un Bakıya səfər planı bəllidi.

Bu barədə "Football-plus.az"a Ağdam təmsilçisinin mətbuat xidmətinin rəhbəri Anar Hacıyev məlumat verib.

Klub rəsmisinin sözlərinə görə, "yaşıl qartallar" paytaxtımıza avqustun 26-da, yəni çərşənbə axşamı təşrif buyuracaq. Macarların Azərbaycanda açıq məşqi planlaşdırılmır. Ona görə ki, qonaqlar oyunöncəsi sonuncu məşqi vətənində edəcək.
Baş məşqçi Robbi Kinin mətbuat konfransının vaxtı da məlumdu. Mütəxəssis görüşdən bir gün əvvəl saat 20.00-da media nümayəndələrinin önünə çıxacaq.

Həmçinin "Ferentsvaroş" ölkəmizə 20 azarkeşiylə birgə gələcək.

Xatırladaq ki, avqustun 27-də "Tofiq Bəhramov"da keçiriləcək oyun 20.45-də start götürəcək.

KƏNAN BAHADIR