Konfrans Liqasında ölkəmizi təmsil edən “Neftçi” “Dinamo Minsk”ə 2:4 hesabıyla məğlub olub.


Matçdan sonra “ağ-qaralar”ın baş məşqçisi Yuri Vernidubun mətbuat konfransı keçirilib.

- Sizi mətbuat günü münasibətilə təbrik edirəm.

- Meydanda sanki, təlim-məşq toplanışından dönmüş komanda yox, uzun yol qət etmiş yorğun “Neftçi” gördük. Bu hazırlıq prosesinə, yoxsa rəqibin təzyiqinə görə belə oldu?
- Bu suala cavab vermək çətindi. Hansısa komanda ilk 15 dəqiqədə üstünlüyü əldə etməklə 2 qol vurursa, belə oyundan sonra hər şey dəyişirsə, mən bunu futbol adlandırmıram. Çoxlu səhvlər edib, rəqibə imkan yaradırlar. Bunlar 20-ci dəqiqədə Balayevin çətinliklə topu çıxarmasından sonra oldu. O, zədələndi. Bundan sonra ilk qolu buraxdıq. Yenə də ikinci hissəyə 2:1 hesabıyla gəldik. Fasiləyə yüksək əhvalla getsəkdə, daha sonra 2-ci qolu buraxdıq. Rəqib səhvlərimizdən oyunu dəyişdi. Qapıdan uzun ötürmədən top buraxırıq. Sonra yenidən 2-3 epizodumuz oldu. Ancaq sən vura bilmirsənsə, rəqib vurur. Penaltidən sonra artıq matçı itirdik. Bu səbəbdən ayıq başla oturub düşünmək lazımdı. Futbolçular barədə danışmaq istəmirəm. İlk növbədə günahkar mənəm.

- Azarkeşlər çox böyük ümidlə gəlmişdi. Onlara necə üzrxahlıq edəcəksiz? Bu sizin çempionatdakı vəziyyətinizə necə təsir edəcək? Hədəfə çata bilməmək vəzifənizə necə təsir edəcək? İstefa verəcəksiniz?
- İki oyun məğlub olduqdan sonra getməliyəm? Bu harda görülüb? Mən fərqli düşünürəm. Bu idmandı. Mən heç vaxt 1-ci məğlubiyyətdən sonra belə şey görməmişəm. Cavab matçına hazırlaşacağıq. Bəlkə siz mənə ciddi yanaşmırsız. Komanda kimi oynasaq, qələbə qazana bilərik. “Dinamo Minsk” - “Sileks” görüşündə də belə olmuşdu. Bəlkə mənə ciddi yanaşmırsız? Orda kimsə istefa verməlisən demədi. Bu cür suallar doğru deyil. Dünən də bu haqda danışmışdım. Komandada tez-tez dəyişiklik olduqda uğursuzluq olur. Belə bir düşüncəm yoxdu.

- Burda azarkeşlər olsaydı, onlara nə demək istəyərdiz?
- Bu futboldu. Belə şeylər olur. Mənə elə komanda deyin ki, hər matçı qazansın.

- Biz də istərdik ki, sizi təbrik edək. “Neftçi” məcazi mənada öz rənglərinin mənasını göstərdi. “Braqa” ilə qarşılaşsaq, hansı rəngi görəcəyik? Ağ, yoxsa qara?
- “Braqa” ilə bağlı heç nə deməyəcəm. Düşüncələrim sadəcə cavab görüşü ilə bağlıdı.

- “Neftçi” digər komandalardan fərqli olaraq daha çox azarkeş təzyiqinə malik komandadı. Buna hazırsız?
- Mən dünən də demişdim ki, təzyiqə hazıram. Güclü insanam. Qorxmuram. Həm ağ günlər olur, həm də qara.

- İlk 10 dəqiqədən sonra “Neftçi”nin yarımmüdafiə xəttində yaranan boşluğa nə səbəb oldu? Demişdiz ki, 8 nömrəyə ehtiyac var. Bu səbəbdən demişdiz?
- Bu barədə çox danışmaq olar. Biz də nəyin çatışmadığını təhlil etməliyik. 20-ci dəqiqədən sonra pressinq edə bilmədik. Bu səbəbdən belə vəziyyət yarandı. Çox çətindi. Yuxu alıb, ayıq başla düşünmək lazımdı. Nəticə çıxarıb irəli baxmaq lazımdı.