“Ferentsvaroş”dan Kadi ilə bağlı rüsvayçı paylaşım – macar azarkeşlər də özündən çıxdı!
Məlum olduğu kimi, “Ferentsvaroş” – “Qarabağ” matçında diqqətlər həm də Kadinin üzərində idi. Ona görə ki, “köhlən atlar” onu məhz “yaşıl qartallar”dan alıb.
Borges hələ həmin ərəfədə verdiyi açıqlamada demişdi:
“Bu, mənim üçün də sürpriz oldu. Mən komandamızın oyununa hazırlaşırdım ki, idman direktorumuz Tamas Haynal zəng etdi, Romao ilə dəyişdirilmək istəyib-istəmədiyimi soruşdu. Dedim ki, bu, klub və mənim üçün ən yaxşı olacaqsa, razıyam. Əvvəlcə düşündüm ki, mənimlə danışıq aparacaqlar. Lakin tezliklə anladım ki, proses artıq son mərhələdədi. Agentimə zəng etdim. O da heç nə bilmirdi”.
Qısası, “Ferentsvaroş” o vaxt Kadini loru dildə desək, urvatsız şəkildə yola salmışdı. İş ondadı ki, qısa müddətdə “Qarabağ”ın heyətində möhkəmlənən və özünü yaxşı tərəfdən göstərməyə çalışan futbolçu Budapeştə rəqib kimi yollandı, oyunun qəhrəmanlarından oldu.Maraqlıdı ki, “Ferentsvaroş” azarkeşləri hələ oyun bitmədən Kadinin performansı haqda müsbət fikirlər səsləndirməyə, klub rəhbərliyini onu “Qarabağ”a göndərdiyinə görə qınamağa başladı. Hadisələrin bu yöndə axarı “Ferentsvaroş” “Qarabağ”a məğlubiyyəti elan etdiyi postu paylaşanda pik həddə çatdı. Ona görə ki, klub paylaşıma Kadinin yerdə qaldığı, Qabor Salainin topla onun başı üzərindən keçdiyi şəkli qoydu. Bundan sonra tənqidlər daha da sərtləşdi. Tərəfdarların əksəriyyəti klubu qeyri-peşəkarlıqda suçladı.
Hər halda, başverənlər Kadinin də diqqətindədi. Əminik ki, o, Bakıda keçiriləcək oyunda da sözünü deyəcək!
KƏNAN BAHADIR
Digər xəbərlər
