"Oyunlarımızı sona qədər yüksək səviyyədə keçirmək istəyirik" - Fərid Namazov
Bu gün “İmişli” 1-ci liqanın 23-cü turu çərçivəsində “Zaqatala”nın qonağı olacaq. Kollektiv bu matçda qalib gəlsə, “Qəbələ”dən sonra premyer-liqaya yüksələn növbəti komanda olacaq.
“Football-plus.az” bu oyunla bağlı “İmişli”nin baş məşqçisi Fərid Namazovun fikirlərini öyrəndi:
“Bizi çətin oyun gözləyir. “Zaqatala” öz meydanında daha əzmkar oynayır. Bu rəqiblə əvvəlki oyunlarda qələbə qazanmışıq. Amma bugünkü daha çətin olacağını düşünürəm. Bəli, premyer-liqaya yüksəlmək üçün bir xal da yetərlidi. Lakin meydana qələbə qazanmaq üçün çıxacağıq. Oyunlarımızı sona qədər yüksək səviyyədə keçirmək istəyirik. Komandada zədəli və ya cəzalı yoxdu. Rəqibə boşluq verməməyə, işimizi sona qədər tam professional şəkildə görməyə çalışacağıq”.
Xatırladaq ki, oyun saat 17.00-da başlayacaq.KƏNAN BAHADIR
