“Bizim üçün rəqibin fərqi yoxdu. Həm liderə, həm də autsayderə qarşı eyni hazırlıq prosesini keçirik. Bu üzdən “İmişli”ylə matça da fərqli yanaşmırıq. Təbii ki, səfərə qələbə üçün yollanacağıq. Zədəli futbolçularımız var. Həmçinin rəqibin bu oyuna hazırlaşmaq üçün bir gün çox vaxtı olsa da, bizim bərpa prosesi üçün yetərli zamanımız yox idi. “İmişli” evdə oynayacaq. Bu komandanın ciddi azarkeş kütləsi var. Biz bu bölgəyə yollanmaq üçün beş saatlıq yol qət edirik. Çünki imkanlarımız zəifdi. Bu üzdən həm də öz azarkeşlərimizi səfərlərə apara bilmirik. Səfərdə dəstək görməyimizin yeganə yolu oyunumuzla rəqibin tərəfdarlarını heyran edib özümüzə çəkməkdi (gülür). Əslində belə hallar olub. Baxımlı oyun sərgilədiyimiz üçün rəqiblərin azarkeşləri tərəfindən alqış qazanmışıq. Təbii ki, futbolçularım ciddi tərəfdar təzyiqinə hazır olmalıdı. Bəzən alınır, bəzən də yox. Hər halda, məqsəd qalib gəlməkdi. Belə şans hər dəfə ələ düşmür. İndi nadir hallarda rast gəlinən vəziyyət yaranıb. Qələbə qazansaq, növbəti oyunlar üçün də yaxşı motivasiya mənbəyi olacaq. Əlbəttə, hər klub kimi biz də premyer-liqaya yüksəlmək istəyirik. İtirəcəyimiz nəsə yoxdu. Qazancımız isə elitadı. Deməli, döyüşməyə dəyər”.