“Bəli, “İmişli”yə və “Karvan”a uduzmaqla şanslarımızı bir qədər azaltdıq. Lakin təslim olmamışıq. Sözsüz, sona qədər mübarizə aparacağıq. İnamımız var. Çempionatın sonuna 2-3 tur qalmayıb ki... Qarşıda bizi 10 oyun gözləyir. Komandama güvənirəm. Çempionatda istənilən rəqibə başağrısı ola biləcək gücdəyik. “İmişli”yə qarşı 10 nəfərlə mübarizə aparsaq da, asanlıqla uduzmadıq. İş orasındadı ki, maliyyə durumumuz ilk “üçlük”də qərarlaşan rəqiblərlə müqayisədə çox aşağıdı. Məşqlərdə 12-13 futbolçu iştirak edir. Üstünlüyümüz hər oyunçunun bütün görüşlərdə var gücüylə çalışması, tapşırıqları maksimum dərəcədə yerinə yetirməsindədi. Belədə heyətin kasad olduğu gözə görünmür. Oyun üslubumuz, performansımız imkan verir ki, ümidli olaq. İndiyə qədər hansısa oyunda əlimizə yanımıza salıb gəzməmişik. Yeganə narahatlığım arxayınlıqla bağlıdı. Xatırlayıram ki, mövsümün ilk 5 matçında uduzmadığımız halda, ardından aşağı pillələrdə qərarlaşan “Difai”dən üç qol buraxıb uduzmuşduq (1:3 – red). Həmçinin bizdən öndə olan “Baku Sportinq” və MOİK-in çox geniş və güclü heyəti var. Hətta “hərbçilər” iki heyətə malikdi. İş orasındadı ki, bu komandalar sabit nəticələr qazanmaqda çətinlik çəkir. Nəticədə xal itirirlər. Biz isə bu yöndə daha qənaətbəxş durumdayıq. Bundan sonra oyunlara psixoloji baxımdan yanaşma tərzi daha önəmli olacaq. Məsələn, sabah “Qəbələ” ilə qarşılaşacağıq. Həmin matçda qalib gəlsək və ya heç-heçə etsək, komandam arxayınlaşmamalıdı. Yalnız hər rəqibə eyni cür yanaşsaq, güclü və zəif komanda prinsipini kənara qoysaq, şanslarımızı artıra bilərik”.