Futbol üzrə ölkə çempionatının 1-ci liqasında 21-ci tura yekun vuruldu.

Turun ilk matçında MOİK “Cəbrayıl”ı sınağa çəkdi. Komandalar fasiləyə bərabər yollansa da, matç “hərbçilər”in əzmkar qələbəsiylə sona çatdı. Daha doğrusu, Qarabağ təmsilçisi hesabı açandan sonra ruhdan düşməyən meydan sahibləri ardıcıl iki qolla qalib gəldi.

“Zaqatala” – “Baku Sportinq” matçı bölgə təmsilçisinin böyükhesablı qələbəsiylə yekunlaşdı. Premyer-liqaya iddialı kollektivlərin qarşılaşdığı matçda qonaqların 17-ci dəqiqədən etibarən azlıqda qalması Rüstəm Məmmədovun komandası üçün göydəndüşmə fürsət oldu. Onsuz da həmin ana qədər hesabda üstün olan meydan sahibləri bununla meydanda hakimiyyəti tam ələ aldı ki, nəticə qonaqlar üçün acınacaqlı oldu.

1-ci liqadakı yerini qorumaq istəyənlərin oyununda isə hesab açılmadı. Söhbət “Qaradağ Lökbatan” – “Mingəçevir” matçından gedir ki, komandalar meydanı hərəyə 1 xalla tərk etdi. Əlbəttə, bu, nə lökbatanlıları, nə də mingəçevirliləri razı sala bilər. Ona görə ki, qalib komanda növbəti qarşılaşmalarda meydana daha arxayın çıxmaq şansı qazana bilərdi.

“İmişli” ilə “doğma divarlar” arasında üz-üzə gələn “Karvan” qonaqların erkən qol vurmasından sonra toparlana bilmədi. Yalnız 2-ci hissədə hesabı bərabərləşdirməyə gücü çatan Yevlax təmsilçisi azarkeşlərini məyus etdi. O başqa məsələ ki, bir xal da kollektiv üçün sərfəli nəticədi. Axı bununla “İmişli”nin 2-ci pilləyə yüksəlmək arzusu suya düşdü. Bu arada protokolda Kənan Kərimovun məşqçi kimi qeyd olunmasının səbəbi kollektivin yeni baş məşqçisinin Azər Məmmədov olmasıdı. Kənan bəy bundan sonra sənəd üzərində köməkçi məşqçi kimi təqdim ediləcək. Təbii ki, söz sahibi olmağa davam etmək şərtiylə.

Tura “Qəbələ” – “Difai” oyunuyla yekun vuruldu. 4:0 hesablı qələbə qazanan “qırmızı-qaralar” çempionluğa doğru daha bir addım atdı. Maraq üçün qeyd edək ki, premyer-liqaya vəsiqəni təmin edən qəbələlilər növbəti matçda da qalib gəlsə, çempion olacaq! Özü də məğlubiyyətsiz! Ağsu təmsilçisinə gəlincə, komandanın aşağı pillələrdən xilas olmaq yönündə cəhdləri fayda vermir. Hadisələrin axarında ciddi dəyişiklik baş verməsə, faciə qaçılmazdı…

1. Qəbələ 21 17 4 0 45-4 55
2. Karvan 21 11 6 4 45-29 39
3. İmişli 21 11 5 5 34-18 38
4. Zaqatala 21 6 10 5 31-26 28
5. Baku Sportinq 21 7 5 9 19-34 26
6. MOİK 21 7 4 10 26-37 25
7. Mingəçevir 21 5 7 9 17-31 22
8. Cəbrayıl 21 5 4 12 19-27 19
9. Difai 21 5 4 12 29-42 19
10. Qaradağ Lökbatan 21 3 7 11 20-37 16

Bombardirlər: Bərhuz Teymurov, Emil Qasımov (hər ikisi “Karvan), Domi Massumo (Qəbələ) – 12.

Növbəti turun oyunları aprelin 17-də keçiriləcək: Cəbrayıl – Mingəçevir, Baku Sportinq – Qaradağ Lökbatan, Difai – Zaqatala, İmişli – Qəbələ, MOİK – Karvan.

KƏNAN BAHADIR