“Bəli, matça çox ciddi hazırlaşırıq. “Zaqatala” yaxşı rəqibdi. Baş məşqçisi Rüstəm Məmmədov uzun müddətdi bu komandanı çalışdırır. Özünəməxsus yolları var. Sürətli hücum və əks-hücumlar sayəsində inamlı oyun göstərirlər. “Zaqatala” sabit nəticələr qazanan azsaylı komandalardan biridi. Cəmi üç xal qabaqdayıq. Oyunun mahiyyətini başa düşürük. Öz iddiamız var. Daha yuxarı pillələrə yüksəlmək istəyirik. Mövsümü azı ikinci pillədə bitirmək niyyətindəyik. Təbii ki, bu sözdə yox, əməldə olmalıdı. Bunun üçün mübarizə aparırıq. Həm məşqçilər korpusu, həm də futbolçular çox çalışır. Futbolçularımdan Gilyerme Silva cəzalı, Həzrət İsayev zədəlidi. İstər fiziki, istərsə də psixoloji baxımdan hər şey qaydasındadı”.