“İmişli” – “Qəbələ” matçı harda keçiriləcək? – bərbad vəziyyətə düşən ot örtüyü ilə bağlı qərar
Heydər Əliyev adına İmişli şəhər stadionun ot örtüyünün yararsız hala düşdüyünü xəbər vermişik.
Xatırladaq ki, bölgənin eyniadlı təmsilçisi bu üzdən 1-ci liqanın evdə baş tutmalı olan 19-cu və 20-ci tur matçlarını Şamaxı Olimpiya İdman Kompleksinin stadionunda keçirməli olub. Düzdü, komandanın “doğma divarlar” arasından uzaq düşməsi qələbə qazanmasına mane olmayıb. Fərid Namazovun kollektivi müvafiq olaraq, “Cəbrayıl”ı (2:0) və MOİK-i (2:1) məğlub edərək 3-cü pillədəki yerini möhkəmləndirib. Lakin “İmişli”ni 22-ci turda liderə - “Qəbələ”yə qarşı çətin ev oyunu gözləyir.
Bəs, klub aprelin 16-18-i aralığında keçiriləcək matça qədər ot örtüyü problemini aradan qaldırıb iddialı rəqibini azarkeşlərinin gözü önündə qəbul edə biləcəkmi?
“Football-plus.az”ın sualını “İmişli”nin icraçı direktoru Aqşin Mürsəlov cavabladı:
“Bəli, stadionumuzun təbii ot örtüyü bərbad vəziyyətdə idi. 2-ci liqa təmsilçisi “Kür-Araz” da ev oyunlarını burda keçirir. Qərara gəldik ki, mövsümün sonuna qədər ot örtüyünü dəyişməyək. İnşallah, premyer-liqaya vəsiqə qazansaq, bu yöndə addımlar atacağıq. Hələ ki ot örtüyünü qoruyaraq ev oyunlarımızı İmişli şəhər stadionunda keçirmək istəyirik. Qazon düzəlməyə başlayıb. Buna görə “Qəbələ”ni öz evimizdə qəbul etmək fikrindəyik. Təbii ki, “Qəbələ” ilə matçı azarkeşlərimizlə birgə keçirmək daha gözəl olar. Növbəti ev matçları haqda isə dəqiq qərar verilməyib”.
KƏNAN BAHADIR
Digər xəbərlər
