“Səfər matçında meydandan başıuca ayrılacağıq” – “Qarabağ”ın rəqibi meydan oxudu
“Qarabağ” Çempionlar Liqasınının 2-ci təsnifat mərhələsinin ilk oyununda “Linkoln Red İmps”i məğlub etdi – 2:0.
“Football-plus.az” xəbər verir ki, “qırmızı şeytanlar”ın futbolçusu Qrem Torilla matçdan sonra klub saytına açıqlama verib. 26 yaşlı mərkəz müdafiəçisinin ilk oyun və öz çıxışı haqda fikirləri:
“İlk oyunda yaxşı oynadığımızı düşünürəm. İki qol buraxsaq da, xeyli epizodda müdafiə olunmağı bacardıq. Əlbəttə, daha aqressiv çıxış edib cavab matçı üçün şanslarımızı artıra bilərdik. Lakin futbolda belə hallar da olur. Bilindiyi kimi, mən bir ildən çox idi zədəliydim. “Qarabağ”la matçda uzun müddətdən sonra ilk oyunumu keçirdim. Performansımdan məmnunam, amma daha artığını etməyə qadir olduğumu anlayıram”.
Cəbəllüttariq klubunun üzvü cavab oyununda daha yaxşı nəticə əldə edəcəklərinə inanır:
“Hesab “Qarabağ”ın xeyrinədi. Belədə cavab oyunu bizim üçün çox çətin olacaq. Əlimizdən gələni edəcəyik. Bir-birimiz üçün meydanda hər şeyimizi verməliyik. İnanıram ki, səfər matçında meydandan başıuca ayrılacağıq”.
Xatırladaq ki, iyulun 30-da “Tofiq Bəhramov”da keçiriləcək “Qarabağ” – “Linkoln Red İmps” matçı saat 20.00-da başlayacaq.
KƏNAN BAHADIR
Digər xəbərlər
