Bilindiyi kimi, “Neftçi”nin yeni baş məşqçisi Roman Qriqorçuk Türkiyədə maraqlı qərar qəbul edib.

Belə ki, ukraynalı çalışdırıcı komandanı ictimaiyyətdən gizlətməyə dair göstəriş verib. Paytaxt təmsilçisi qardaş ölkədə keçirdiyi yoxlama oyunlarının yayınlanmasını istəmir. Hətta o, oyunların icmalının hazırlanmasına da qadağa qoyub. Bəllidi ki, Qriqorçukun addımı bir məqsədə xidmət edir - rəqiblərin “Neftçi”nin mövcud durumu barədə məlumat toplamasını əngəlləmək.

Lakin bu yöndə planlar pozulub. Daha doğrusu, “ağ-qaralar”ın “Ərzurumspor”la keçirdiyi yoxlama oyunu “Kartv Erzurum” “yutub” kanalı vasitəsilə yayınlanıb. Çəkilişi “Ərzurumspor” azarkeşlərindən və ya bölgədə çalışan jurnalistlərdən birinin həyata keçirdiyi deyilir. Hər halda, bunun fərqi yoxdu. İş orasındadı ki, oyunu izləyən “Neftçi” azarkeşləri Qriqorçukun fəaliyyətindən və tərzindən narazı qalıb. Onlar oyuna “küçə futbolu oynayırlar...”, “sanki meydançaya məcbur çıxıblar”, “ayıb olsun”, “qeyri-peşəkarlıq çempionu “Neftçi!” kimi rəylərlə reaksiya verib. Düzdü, Qriqorçuk həmin yoxlama oyununda bir neçə əsas futbolçunu meydana buraxmayıb. Yenə də Qara Qarayav, Rza Cəfərov, Höccət Haqverdi, Azər Əliyev, Emil Səfərov, Fərid Yusifli, Ağadadaş Salyanski kimi futbolçuların hələ də bu tərzdə tənqid ediləcək səviyyədə olması komandaya ümidləri azaltmaqdadı. Qriqorçuk “hədəflərimiz yüksəkdi” deyir. Görəsən, neçənci yeri nəzərdə tutur? Bunu bilmirik, Məlum olan odu ki, “ağ-qaralar” növbəti mövsüm çempion ola bilmək üçün daha çox çalışmalıdı. Nə qədər? “Qarabağ”dan da çox!

KƏNAN BAHADIR