“Rəhbərlik də demədi ki, gəl burda dincəl” - Elnur Abdullayev Qusara niyə gedib?
Ötən mövsümün ikinci yarısında uğursuz nəticələrə görə Bəhram Şahquliyevlə yollarını ayıran “Şahdağ Qusar” mövsümü köməkçi məşqçi İzzət Hacıxanovun rəhbərliyi altında başa vurdu.
“Football-plus.az” xəbər verir ki, ötən mövsümü 3-cü yerdə bitirən vuran 2-ci liqa təmsilçisi növbəti “futbol ili” üçün addımlar atmağa başlayıb. Belə ki, çempionluğu hədəfləyən “Şahdağ Qusar” sonuncu dəfə “Səbail”in akademiyasında çalışan B kateqoriyalı məşqçi Elnur Abdullayevlə razılıq əldə edib. Gənc çalışdırıcıyla “1+1” illik müqavilə imzalanıb. “Neftçi”, “Xəzər-Lənkəran”, “İnter” (indiki “Şamaxı”), “Bakı” kimi klublarda forma geymiş veteran futbolçunun bu təyinatla bağlı fikirlərini öyrəndik:
“Futbolu bitirəndən sonra akademiyada çalışmağı seçdim. Çünki təcrübə toplamaq üçün uşaq futboluyla məşğul olmaq daha məqsədə uyğundu. Birdən-birə yuxarı qalxmaq risklidi. 4 il “Səbail”in U-14 və U-16 komandalarının baş məşqçisi oldum. Təcrübə yığandan sonra təklif gəldi, hər bir məşqçi kimi mən də şansımı yoxlamaq istədim. İnşallah, uğurlu olar”.
Abdullayev həmçinin uzun müddət “Xəzər-Lənkəran”da Rahid Əmirquliyevlə komanda yoldaşı olub. Görəsən, “Şahdağ Qusar”ın kapitanı olan Əmirquliyevin bu təyinatda rolu varmı? Gənc məşqçi mövzunu belə şərh etdi:
“Rahidlə 6 ilə yaxın bir yerdə oynamışıq. Yəni həm komanda yoldaşı, həm də dost olmuşuq. İndi də dostluq münasibətlərimiz davam edir. Ancaq komanda içində yalnız iş önəmlidi. O da bunu bilir. Özü də mənə təklif etdi ki, belə bir variant var. Mən də getdim, danışdım və dəyərləndirdim. Rəhbərlik də demədi ki, gəl burda dincəl. Qarşıma şərt oyuldu ki, komanda mövsümün sonunda 1-ci liqaya vəsiqəni təmin etməlidi. Biz də əlimizdən gələni etməyə çalışacağıq”.
Göründüyü kimi, yeni baş məşqçi rəhbərliyin ondan yalnız çempionluq tələb etdiyini bildirdi. Bəs rəhbərlik üzərinə düşən vəzifəni yerinə yetirərək, lazım olan maliyyəni ayıracaqmı? Veteran futbolçunun cavabı belə oldu:
“Maliyyə baxımından heç bir problemimiz yoxdu. Rəhbərlik də bildirib ki, hədəf yalnız çempionluqdu və istədiyim hansısa futbolçunun transferində heç bir problem yoxdu. Hesab edirəm ki, bu liqaya görə şərait, maliyyə cəhətdən ən yaxşı üç komandadan biri “Şahdağ Qusar”dı. Komandanın 14-ə yaxın oyununu izləmişəm. Düşünürəm ki, futbolçuların potensialı çempion olmaq üçün yetərlidi. Heç bir məşqçi deyə bilməz ki, yüz faiz çempion olacam. Bu yalandı. Lakin komandanın çempion olması üçün əlimizdən gələni artıqlamasıyla edəcəyik”.
KAMAL SƏFƏR
Digər xəbərlər
