Rahid Əmirquliyev baş məşqçi söhbətini yaxın buraxmadı
“Şahdağ Qusar”ın mövsümün ikinci yarısında keçirdiyi 4 matçda cəmi 5 xal toplaması baş məşqçisi Bəhram Şahquliyevin istefaya göndərilməsi ilə nəticələndi.
Belə ki, komanda mövsümün ikinci yarısında 2 heç-heçə, 1 qələbə və 1 məğlubiyyətdən sonra turnir cədvəlində 3 pillə geriləyərək 5-ci pillədə qərarlaşıb. 18-ci turda “Kür-Araz”a məğlubiyyət (1:3) klub rəhbərliyinin səbr kasasını daşırıb. Şahquliyevin istafasından sonra boş qalan posta komandanın kapitanı, millinin sabiq futbolçusu Rahid Əmirquliyevin təyin olunacağıyla bağlı xəbərlər yayılıb. Rahidin bu xəbərə münasibətini öyrəndik:
“Doğrudu, Bəhram müəllim komandadan ayrıldı. Bilindiyi kimi, məni də bu komandaya elə o dəvət etmişdi. Doğrusu, “Şahdağ Qusar” mənim üçün doğma komandadı. Çünki futbola orda başlamışdım. Futbolda belə şeylərə tez-tez rast gəlinir. Yəni məşqçi dəyişikliyi, oyunçunun tez-tez klub dəyişməsi normaldı. Bəhram müəllimə isə böyük hörmətim var, həmişə olub, bundan sonra da olacaq. Futbol belədi ki, bu gün burdasan, sabah başqa yerdə. Mənim baş məşqçi vəzifəsinə təyin olunmağım yalandı. Bu vaxta qədər necə oynayırdımsa, bundan sonra da elə oynayacam. Klubla mövsümün sonuna qədər müqaviləm var”.
KAMAL SƏFƏR
Digər xəbərlər
