“Neftçi” noyabrın 18-də yoldaşlıq oyununda “Zenit”lə üz-üzə gələcək.

Bu fikir çoxdan gündəmdə idi. Vaxt-vədə yetişdi. 2 gün sonra qarşılaşma baş tutacaq. Təbii ki, flaqman üçün maraqlı sınaq olacaq.

Oyundan öncə millimizin üzvü Ruslan Abuşova vida mərasimi keçiriləcək. Bildiyiniz kimi, o, karyerasını bitirib. Bu səbəbdən də “Neftçi” rəhbərliyi yetirmələrinə jest edib. Mənə görə, bu, düzgün addım deyil. 12 ildi idman mediasındayam. Demək olar ki, futbol sahəsində baş verən bir çox prosesdən xəbərdaram. Xatırlayırsızsa, Ruslan Abuşov ən parlaq dövründə “Neftçi”dən “Xəzər Lənkəran”a transfer olundu. Cənublular indi fəaliyyət göstərmir. Amma “Neftçi” azarkeşləri arasında sorğu keçirilsə, əzəli rəqib kimi “Xəzər Lənkəran”ın adını çəkəcəklər. İndi mənə maraqlıdı ki, keçmişdə “Neftçi”dən ayrılıb cənub təmsilçisinə transfer olunan oyunçuya nə üçün vida mərasimi keçirilir? Nə olsun ki, Ruslan “Neftçi”nin yetirməsidi. Bilirsiz ki, Luiş Fiqo “Barselona”dan “Real”a keçid etmişdi. Bu keçid dünya mediasında, əsasən də İspaniyada böyük səs-küyə səbəb olmuşdu. Təsəvvür edin ki, portuqaliyalı futbolçu karyerasını bitirəndən sonra “Barselona” rəhbərliyi hansısa komanda ilə yoxlama görüşündə onun üçün vida mərasimi təşkil edir? Sizcə, bu, normaldı? Təbii ki, yox! Bəs “Neftçi” nə üçün belə addım atır? Bax bu, düşündürücü məqamdı. Zaur Tağızadəyə, Vadim Vasilyevə, Qurban Qurbanova vida mərasimi keçirməyən “Neftçi”nin Ruslan Abuşov üçün belə addım atması təəccüblüdü...

İLKİN SULTANLI