"Əvvəlcə onu xüsusi vurğulayım ki, Asif Məmmədov ən dəyərli futbolçumuzdu - həm kapitan, həm də insan kimi hamının hörmətini qazanıb. Onun "Qəbələ" üçün etdikləri haqda gərək cild-cild kitablar yazıla. Asif son oyunda göstərdi ki, futbolda yaş amili əsas deyil. Kapitanımız 37 yaşı olmasına rəğmən, son 15 dəqiqədə hamıdan çox meydanda döyüşdü. Amma məsələ burasındadı ki, komandada çoxları Asif kimi can qoymur. Kapitandan başqa qismən Urfanla İlkinin fədakarlığını vurğulayardım. Həmin gün Asifi yanımıza çağırıb nəticələrdən və bir çox futbolçuların, əsas da legionerlərin çıxışından narazı olduğumuzu bildirdik. Oyuna diqqətlə baxan biri kimi deyirəm. Xalaylanın əlinə qol vurmaq üçün yaxşı şanslar düşdü. Amma yararlana bilmədi. Halbuki məhlədə oynayan uşaqlar belə onun qaçırdığı epizodları qaçırmazdı. Bu gün reallıq belədi ki, gedən legionerləri gələnlər layiqincə əvəz edə bilmir. Maaşları vaxtında verilir, qələbəyə görə mükafat alırlar, yaşamaları və futbol sərgiləmələri üçün hər cür şərait var. Amma meydanda sadaladıqlarımın haqqını vermirlər. Bu gün uğursuzluğumuzun ilk səbəbi əcnəbi futbolçuların zəif çıxışıdı. 2-ci səbəb isə hakimlərin, demək olar ki, hər oyunda bizə qarşı qərəzli mövqe sərgiləməsidi. Elə son matçda da Elçin Məsiyev bizə qarşı haqsızlıq etdi. “Zirə”nin futbolçusu Renato futbolçumuza qarşı aşkar kobudluq etsə də, xeyrimizə penalti vermədi. Ümumiyyətlə, hakim idarəçiliyi başda olmaqla ölkə futbolunda vəziyyət bərbaddı. Gündən-günə vəziyyət daha da acınacaqlı hal alır. Hesab edirəm ki, AFFA və PFL ləğv edilməli, yeni qurumlar yaradılmalı və onların başına futbolu bilən, ölkə futbolunu irəli aparan şəxslər gətirilməlidi. Mən 2005-ci ildən "Qəbələ"nin fanatıyam. Klubun pis və yaxşı günlərində onun yanında olmuşam. Hazırkı vəziyyət mənim ürəyimi ağırdı. Odu ki, "qırmızı-qaralar"ın formasının qədrini bilməyənlər onu soyunub getsinlər. Lazım olsa, aşağı liqaya düşərik və yerli uşaqlarla şərəflə o formanı daşıyarıq. Məhz həmin uşaqlarla zamanla yenidən klubu elitaya qaldırarıq. Amma bizə can qoymayan futbolçular lazım deyil".