Doğma publika qarşısında "Turan Tovuz"u sınağa çəkən "Qəbələ" ağır itkiylə üzləşdi.

Belə ki, 86-cı dəqiqədə Asif Məmmədov əzələsini dartaraq meydanı xərəkdə tərk etdi. Müayinə zamanı bəlli oldu ki, kapitan üçün mövsüm erkən bitib. Görəsən, "11” nömrə bu çempionatda necə çıxış edib? 36 yaşlı futbolçunun cari mövsümdəki göstəricisi belədi: premyer-liqada 30 oyun, 1645 dəqiqə, ölkə kubokunda 3 oyun, 165 dəqiqə. Ümumilikdə 33 qarşılaşmada 1810 dəqiqə meydanda olan kapitan qol hesabını açmasa da, bir neçə oyunda məhsuldar ötürmə və 4 sarı vərəqə (2-si kubokda) almaqla diqqəti çəkib.

Təcrübəli futbolçu "Qəbələ"də qapı xəttindən başqa bütün mövqelərdə faydalı olmağa çalışır. Həm əsas pleymeyker, həm orta sahədə top saxlamaq və “qara iş” görmək (əsasən də Abu Akalla İsnikin yoxluğunda), həm hücumlara qoşulmaq, həm də hamılıqla müdafiə olunmaqda səriştəli oyunçu kimi özünü doğruldub. Bundan başqa, ağsaqqal kimi də komanda yoldaşlarını yumruq kimi ətrafına yığmağı bacarıb. Ümumiyyətlə, futbolda yazılmayan bir çox qayda var. Onlardan biri də hər komandada ağsaqqal futbolçuların yer almasıdı. Bizim kimi futbol ənənələri zəngin olmayan və peşəkarlıqdan çox yaşın, şəxsi nüfuzun rol oynadığı ölkələrdə təcrübəli futbolçularsız keçinmək çətindi.

"Qarabağ"da Maksim Medvedev, "Neftçi"də Aqil Məmmədov, "Zirə"də Anar Nəzirovla Ruslan Abuşov, "Kəpəz"də Tural Axundov, "Turan Tovuz"da Kamal Bayramov, "Şamaxı"da Elvin Məmmədov, "Səbail"də Rahid Əmirquliyevi nümunə göstərmək olar. Onlar şans qazanmasalar belə, komanda daxilində intizam, əhval-ruhiyyənin formalaşmasında və futbolçularla məşqçilər korpusu arasında körpü rolunu oynayırlar.

Asif adı çəkilənlərdən həm də futbol oynamaq eşqinin çox olması ilə fərqlənir. Ölkə kubokunun yarımfinalının "Səbail"lə cavab qarşılaşmasında sarı vərəqə limitini dolduran təcrübəli futbolçu "Neftçi"ylə final oyununu buraxacağına görə məyus olmuşdu. Hətta 32-ci turda "dənizçilər"ə 4:2 hesabıyla qalib gəldikləri oyundan sonra mənə verdiyi müsahibədə belə demişdi:

Amma kapitan üçün ən böyük məyusluq kubokun finalıyla yanaşı, çempionatı erkən başa vurmaq oldu. Bir halda ki, 36 yaşlı futbolçu yaşıl meydandan doymayıb, niyə də onun təcrübəsindən, gücündən istifadə etməyəsən?!

Kapitan sıradan çıxsa da, "Qəbələ" iki “cəbhə”də avrokubok şansını saxlayır. Komanda Elmar Baxşıyevin rəhbərliyi altında qarşıya qoyduğu hədəfə çatmaq üçün sona qədər çarpışacaq. Odu ki, "qırmızı-qaralar"ın Asif Məmmədovla müqaviləni ən azı bir il də uzadacağı şübhə doğurmur. Əminəm ki, bu kapitanın da ürəyincədi.

ABDULLA İSMAYILOĞLU