AFFA Hakimlər Komitəsinin sədri Rəhim Həsənov FİFA referisi Əliyar Ağayevə premyer-liqada etimad göstərməsə də, ədalət təmsilçisi UEFA-dan təyinat aldı. Söhbət iyunun 5-də Belarusla Suriya milliləri arasında keçirilən beynəlxalq yoldaşlıq oyunundan gedir.

“Football-plus.az” xəbər verir ki, bu qarşılaşma Belarusun 4:1 hesablı qələbəsiylə yekunlaşıb. Əliyar Ağayev iki sarı vərəqə göstərib. Hər iki rəsmi xəbərdarlıq Belarusun futbolçularına edilib. Matçda xoşagəlməz hal, yəni ədalət təmsilçisini əlavə tədbirlər görməyə vadar edəcək hadisə yaşanmayıb.
Əliyar Ağayevin köməkçiləri Zeynal Zeynalov və Elşad Abdullayev olub. Dördüncü hakimin vəzifələrini isə Belarusdan olan İhar Şumilau icra edib.

Beləliklə, sonuncu dəfə martın 19-da keçirilən Konfrans Liqasının 1/8 final mərhələsinin AEK (Cənubi Kipr) – “Kristal Pelas” (İngiltərə) matçı üçün baş hakim kimi beynəlxalq təyinat alan Əliyar Ağayev uzun müddət sonra yenidən ölkə xaricində iş başında olub.

Xatırladaq ki, ədalət təmsilçisi ölkə kubokunun yarımfinalının “Turan Tovuz” – “Zirə” qarşılaşmasında nominal meydan sahiblərinin xeyronə iki penaltini təyin etmədiyinə görə cəzalandırılmışdı.

KƏNAN BAHADIR