Ötən tur Masazır səfərində son dəqiqələrdə fərqlənməklə qələbə qazanan “Zirə”nin liderliyi əldən vermək fikri yox idi.

Özü də rəqib aşkar autsayder “Qəbələ”disə… Hər iki komanda itkilər sarıdan əziyyət çəkirdi. Buna rəğmən, tərəflər oyuna sürətli başladı. İlk qol cəhdi meydan sahiblərindən gəldi. Eldarın iti bucaq altından zərbəsini Qırtımov boş qapıdan çıxardı. 17-ci dəqiqədə qonaqlardan Tetteh yüzfaizlik qol imkanını boşa verdi. Növbəti hücumda – 30-cu dəqiqədə Urfan qapını yoxlasa da, Tyaqo yerindəydi. Hissənin sonralarına yaxın Cibrilanın iti bucaq altından zərbədinə Qırtımov ayaq qoydu. Komandalar fasiləyə qolsuz bərabərliklə yollandı. 2-ci yarıda kreativ futbol gözləsək də, ilk 10 dəqiqədə mübarizə meydanın mərkəzində getdi. 58-ci dəqiqədə Suma sağ cinahdan cərimə zərbəsini yerinə yetirərkən top “canlı sədd” quran iki oyunçudan birinin – Akakponun əlinə dəydi. Məsiyev əvvəlcə bu epizodu gözdən qaçırsa da, VAR-dan gələn siqnaldan sonra monitora yaxınlaşmağa ehtiyac duydu. Referi ilə VAR otağının uzun-uzadı çəkən müzakirəsi zamanı yadıma “əri ölmüş arvadı it də tutdu bir yandan” məsəli düşdü. Öz aramızda, onsuz da “Qəbələ” uçurumun dibindədi. Penalti qərarı isə tabuta çalınan sonuncu mıx rolunu oynadı. 65-ci dəqiqədə “nöqtə”yə yaxınlaşan Qismət qapıçıya heç bir şans vermədi. Meydan sahibləri qoldan sonra da geri çəkilmədi. Əksinə, Rəhim iki dəfə fərqi artıra bilərdi. 82-ci dəqiqədə isə qonarlardan Abramovun zərbəsi az fərqlə qapıdan aralı keçdi. Oyuna əlavə olunan dəqiqələrdə "Qəbələ" təzyiqi artırdı. Ülvi boş qapını nişan alsa da, son anda Lukoviç qola “yox” dedi. Hakimin final fiti "qartallar"ın 8-ci qələbəsini rəsmləşdirdi. “Zirə” 13 oyunda vurduğu 13 qolla zirvədədi. Doğrudan da, qibtəolunası uğur formuludu!

Gözdən qaçmadı
* Oyunu “Qəbələ”nin 50-yə yaxın azarkeşi də izləyirdi.
* 66-cı dəqiqədə Zebli Akakpoya qarşı sərt oynasa da, hakimin fiti susdu. Ehtiyat oyunçular skamyasında oturan Asif Məmmədov buna görə coşdu. Kapitan öncə 4-cü hakimə etiraz etdi, ardından baş hakimə "sarı ver də, …" dedi. Yeri gəlmişkən, 83-cü dəqiqədə Akakponu əvəz edən Asif cari mövsümdə ilk dəfə meydana çıxdı.
* "Zirə" futbolçuları qələbəni azarkeşləriylə qeyd etdi. Qəbələdən gələn azarkeşlər isə öncə Asif Məmmədovu səslədi. Kapitan bütün futbolçularla birgə fanatlara tərəf getdi. Bu zaman bölgə təmsilçisinin çılğın azarkeşlərindən Elvin Əliyev kapitana etirazlarını çatdırdı.

ABDULLA İSMAYILOĞLU