Futbol ənənələrinə görə məşhurlaşan, bu idman növündə dünyanın ən titullu ölkələrindən sayılan Almaniya bazar günü başa çatan basketbol üzrə dünya çempionatının finalında Serbiyaya qalib gəldi.

"Football-plus.az" xəbər verir ki, tarixində ilk dəfə! Bəs kimsə almanların bu titula layiq olmadığını deyə bilərmi? Kanadalı mütəxəssis Qordi Herbertin rəhbərlik etdiyi komanda turnirdə keçirdiyi 8 oyunun hamısında qalib gəldi. Hərçənd rəqibləri sırasında aşkar favoritlər də var idi. Serbiya və ABŞ ilə yanaşı, Sloveniya, Avstraliya və DÇ-2023-ün kəşfi olan Latviyanın adını çəkə bilərik. Məhz latviyalılar almanları medalsız qoymağa çox yaxın idi. Ancaq onda hər şeyi Frants Vaqnerin qeyri-adi oyunu xilas etdi. Yarımfinal və final oyunlarında Dennis Şreder iş başında idi. Təsadüfi deyil ki, turnirin MVP mükafatı da ona qismət oldu.

Əslində ekspertlərin və azarkeşlərin əksəriyyəti turnirdə ABŞ – Kanada finalını gözləyirdi. Ancaq bu komandaları məğlub edən almanlarla serblər haqlı olaraq, finala vəsiqə qazandı. Almaniya yığması güclü hücum xəttinə malikdi. Bu komanda ABŞ ilə oyunda rəqibə 111 xal verməsinə baxmayaraq, yenə də parket üzərindən qələbə ilə ayrıldı. Vaqner qardaşları, Tays, Foyqtmann və Şreder qələbə yolunda əlindən gələni etdi. Heyətdə cokerlər də var idi. Məsələn, Amerika ilə oyunda Andreas Obstın belə parlayacağını kim gözləyərdi (“Bavariya”nın müdafiəçisi 24 xal topladı, eləcə də 8 üçxallıq atışından 4-ü hədəfə düşdü)? Bəs pley-offun bütün oyunlarında Bonqun müdafiədə əla oyununu necə?

Final oyununu izləməyə dəyərdi. İlk yarı həlledici oyunda bu turnirin məhz real cəhətdən ən güclü komandalarının üz-üzə gəlməsinə dair növbəti sübut idi. 20 dəqiqədən sonra tabloda bərabərlik hesabı yanırdı – 47:47. Serblərin heyətində Marinkoviç, Davidovats və Petruşev parlaq oyun göstərirdi. Boqdanoviç bir qədər kölgəyə çəkilsə də, lazımi anlarda məsuliyyəti boynuna götürürdü. Almanların heyətində isə Şreder oyunu öz üzərinə götürmüşdü. Komandası 4 xal geri düşəndə məhz o, üçxallıq atışla yadda qaldı, növbəti hücumda isə Yoviçi qabaqlayıb daha 1 xal qazandı. Fasilə ərəfəsində hesabın bərabərləşməsi almanları əməlli-başlı ruhlandırdı.

Fasilədən sonra isə serblər oyunun ipini əldən buraxdı. Onlar 7 dəqiqə ərzində cəmi 6 xal topladı. Titula doğru şütüyən almanlar kreyser sürəti yığmışdı. Şreder və Vaqnerlə yanaşı, Foyqtmann fədakarlıq göstərirdi. O, Milutinovla duellərdən qalib ayrıldı, Frants Vaqnerə verdiyi ötürmə isə konfet kimi şirin idi. Almaniyanın 3-cü çeyrəkdə 22:10 hesabıyla qələbə qazanması oyunun taleyinin müəyyənləşməsi baxımından həlledici oldu. Düzdü, serblər hadisələrin axarını dəyişmək üçün sonuncu çeyrəkdə əlindən gələni etdi. Onlar hətta 20:14 hesabıyla qələbə də qazandılar. Ancaq hesabı bərabərləşdirmək və oyunu overtayma daşımaq mümkün olmadı. Final fitindən sonra serblər ağlayırdısa, almanlar Herberti atıb-tuturdu...

final
Almaniya - Serbiya 83:77 (23:26, 24:21, 22:10, 14:20)
3-cü yer uğrunda oyun
Kanada – ABŞ 127:118 OT (34:25, 24:31, 33:26, 20:29, 16:7)
5-ci yer uğrunda oyun
Latviya - Litva 98:63 (28:20, 21:18, 28:9, 21:16)
7-ci yer uğrunda oyun
Sloveniya – İtaliya 89:85 (15:18, 27:23, 28:19, 19:25)