''Qalatasaray''ın bir həftə öncə bəyanat yayaraq yollarını birdəfəlik ayırdığı Mauro İkardi ilə bağlı növbəti dəfə maraqlı xəbərlər gəlməkdədi.

Argentinalı ulduzun həm ona irəli sürülən təklif, həm də klubun onunla bu cür soyuq şəkildə vidalaşması üzündən İstanbul nəhəngindən çox inciyib.

Türkiyənin ''Təqvim'' nəşrinin yazdığına inansaq, rəhbərlik İkardi ilə əlaqə quraraq onu avqustun 2-də ''Rams Park''da ''Renn''ə qarşı keçiriləcək hazırlıq oyununa dəvət edib. Rəhbərlik bir növ bu matçı İkardinin vida oyununa çevirmək istəyir. Amma indiyə qədər 33 yaşlı futbolçu ''Cim-Bom''a müsbət və ya mənfi heç bir cavab deməyib! Ümumiyyətlə, İkardinin sosial şəbəkələrdə də indiyə qədər ''Qalatasaray''dan ayrılmasına dair heç bir paylaşım etməməsi onun nə dərəcədə incik olduğunu göstərir.

Bəzi mənbələrin yazdığına inansaq, İkardi klubun ona qarşı haqsızlıq etdiyini düşünür. O, xüsusilə başqan Dursun Özbək və baş məşqçi Okan Burukdan inciyib.

Xatırladaq ki, ''Qalatasaray'' iyunun 30-da müqavilə müddəti başa çatan İkardiyə əvvəlki maaşının yarısını, yəni 5 milyon avro təklif etmişdi. İkardi və meneceri uzun müddət bu təklifi qəbul etməyincə Türkiyə çempionu tarixinin ən məhsuldar əcnəbi futbolçusu ilə yollarını ayırmaq qərarına gəldi.