"Araz-Naxçıvan" növbəti mövsümə Bakı Olimpiya Stadionunda hazırlaşır. Azər Bağırov komandanı komplektləşdirməklə məşğuldusa, klub rəhbərliyi stadion, sponsor və digər vacib çatışmazlıqların aradan qaldırılması istiqamətində işlər görür.

"Football-plus.az" xəbər verir ki, iyulun 5-dən çalışmalara başlayan İdarə Heyətinin hədəfi 2023/24 "futbol ili"ni bir neçə cəhətdən əlamətdar keçirməkdi. Yəni premyer-liqanın debütantı həm də avrokuboklara vəsiqə qazanmaq uğrunda mübarizə aparacaq. Digər çempionat iştirakçılarının da hazırlıq prosesi haqda yazırıq. Görünən odu ki, "ağ-qırmızılar"ın işi çox çətin olacaq. Hələ ki turnir cədvəlinin ilk "dördlük" namizədləri "Qarabağ", "Sabah", “Neftçi”, "Qəbələ" və "Zirə"di. Lakin bir çoxunun qəbul etdiyi kimi bu futboldu və hər an hər şey ola bilər.
Bəs "Araz-Naxçıvan" yeni mövsüm üçün hansı hazırlıq işlərini görür? Yeniliklərə keçid alaq. Klub qarşıdakı "futbol ili"ndə "Diadora"nın forma və geyim dəstlərindən istifadə edəcək. Artıq İtaliya şirkəti ilə müqavilə bağlanıb. Şirkətin komanda üçün istehsal edəcəyi məhsulların yaxın günlərdə təqdim ediləcəyi deyilir. Oyun formaları ağ və qırmızı rəngdə olacaq.

Hazırda komandanın komplektləşdirilməsi istiqamətində addımlar atılır. Klubdaxili mənbələrdən əldə etdiyimiz məlumata görə, 2-3 yerli futbolçu ilə yanaşı, 5-6 legionerin transferi yönündə çalışmalar davam edir. Bundan sonra hücumçu, mərkəz müdafiəçisi və qapıçı mövqelərinin möhkəmləndirilməsi nəzərdə tutulur. Beləliklə, Naxçıvan təmsilçisinin indiyəqədərki transfer çalışmalarına keçid alaq. Klub bir müddətdi baxışda olan, “Turan Tovuz”la yoxlama oyununda da iştirak edən bosniyalı qapıçı ilə müqavilə bağlayıb. Komandanın "çərçivə"sini yeni mövsümdə Semir Bukviç qoruyacaq. 188 sm boya malik 32 yaşlı qolkiperin son klubu vətənində Tuzla “Sloboda”sı olub. Əsasən Bosniya və Hersoqovina klublarında çıxış edən qapıçı Polşada legioner həyatı yaşayıb.

"Ağ-qırmızılar" premyer-liqa klubu olmağın əsas şərtlərindən olan əvəzedici komanda ilə bağlı da addım atıb. Heyətin formalaşdırılması istiqamətində çalışmalar sürətləndirilib. Əvəzedicilərin çempionatında debüt edəcək ikinci komandanın baş məşqçisi vəzifəsi Zaur İsmayılova tapşırılıb. Qapıçılara isə Cəmaləddin Əliyev məşq keçəcək. Klub hər iki mütəxəssislə birilliyə anlaşıb.

Yeri gəlmişkən, əvəzedici heyət, U-17 və U-19 komandaları müvəqqəti Bakıda məskunlaşacaq. İkinci heyət hazırda Binə stadionundadı. Redaksiyamıza daxil olan digər məlumata görə, debütant baş sponsorsuz qalıb. Vüqar Abbasovun rəhbərlik etdiyi “Cahan Holdinq” klubu maliyyələşdirməkdən imtina edib. Naxçıvan təmsilçisi dərhal yeni baş sponsor axtarışına başlayıb. Tezliklə danışıq aparılan şirkətlərdən biri ilə anlaşma əldə olunacağı gözlənilir. Çox güman ki, bu, gəmilərlə yüklərin daşınması xidməti göstərən “Samaya CO LTD” MMC olacaq. Maraq üçün bildirək ki, sözügedən şirkətin xalis mənfəəti ötən il 2,5 dəfə azalıb. Qeyd edək ki, uzun müddətdi yerli mətbuatda “Cahan Holdinq”in maddi gücünün xeyli zəiflədiyi haqda xəbərlər tirajlanırdı.

“Araz-Naxçıvan” bir-iki gün ərzində Türkiyənin Ərzurum şəhərinə yollanacaq. Bunun üçün, sadəcə, sənədləşmə prosesinin tamamlanması gözlənilir. Qardaş ölkədəki təlim-məşq toplanışında bir neçə yoxlama matçının keçirilməsi nəzərdə tutulub. Rəqiblər hələ bəlli olmasa da, yerli klublarla danışıqlar yekunlaşmaq üzrədi. Toplanışın 10 gün davam etməsi planlaşdırılır

KƏNAN BAHADIR