“PARI Premyer” kuboku başa çatdı. Flaqman bu turnirdə heç də qənaətbəxş çıxış etmədi. Düşünün ki, 3 görüşdə rəqiblər cəmi 1 dəfə məyus edildi. Onu da Matias Saldanya penaltidən vurdu. Bəli, doğrudu ki, kollektiv oyunlara faktiki baş məşqçisiz və məhdud heyətlə çıxdı. Emin Mahmudovun məsələsi həll olunmamışdı, ilk iki görüşdə qapıçılar zədə aldı. Amma bunları bəhanə edərək nəticəni gözardı etmək olmaz. Açıq-aşkar gördük ki, İqor Getmanla Vadar Nuriyev bir məşqçinin yerini verə bilmədi.

2 ildən çox müddətdə 4-lü müdafiə ilə oynayan komandanın sistemini dəyişərək 5-4-1-dən istifadə edən şəxslərdən nə gözləmək olardı ki?!

Nə isə, mövzu başqadı. Açığı, flaqmanın “Fənərbaxça” qarşısında aciz qalacağını düşünürdük. Çünki rəqib heyətində ulduzlar olan Türkiyə nəhəngi idi. Lakin oyun başlayan kimi xoş sürprizlə qarşılaşdıq. Sanki bir həftə öncə “Srvena Zvezda” önündə darmadağın olan “Neftçi”dən əsər-əlamət yox idi. Azərbaycan mediasında haqqında ancaq mənfi fikirlər səslənən Adrian Mutu təqribən 30-35 saat ərzində komandaya əl gəzdirə bilmişdi. Hiss olunurdu ki, rumıniyalı danışıqlar gedən müddətdə boş dayanmayaraq məşqçilər heyətindən “ağ-qaralar”la bağlı raport tələb edib. Bunun sayəsində kollektivdəkilərin nəyə qadir olduğunu öyrənib. Elə bu məqam çox şeydən xəbər verir. Məsələn, “Fənərbaxça” ilə oyunda bizim üçün aydın oldu ki, “Neftçi” hazırkı heyətlə belə “Jelezniçar” – “Dinamo” (Minks) cütünün qalibini üstələyəcək potensialdadı. Düzdü, bəzi mütəxəssislər, elə mən də Laurentsiu Regekampfın dövründən bu düşüncə idik. Lakin klub daxilindəki xaos ümidlərimizin ölməsinə səbəb oldu. Amma istanbulularla görüş “Neftçi” azarkeşlərini və ictimaiyyəti müəyyən qədər rahatlatdı.

Bəli, Mutu məşqçi bacarığını ilk oyunda ortaya qoydu. Futbolçular “Fənərbaxça” ilə qarşılaşmada yaxşı mənada özlərinə bənzəmirdi. Ömər Buludov bəlkə də karyerasının ən yaxşı oyununu sərgiləyirdi. Ola bilər ki, rəqibin adı da buna təsir etdi. Düzdü, 2-ci hissədə komandanın yetərsizliyi hiss olundu. Düşünürəm ki, Mutu heyətdə hansı çatışmazlıqların olduğunu, kimlərin bu kollektivə lazım olmadığını gördü və yeni mövsüm başlayana kimi bu problemləri həll edəcək.

Bir sözlə, Mutunun şəxsi həyatındakı məsələləri qabardaraq hər şeyin “Neftçi” üçün pis olacağını söyləmək doğru olmaz. Onsuz da flaqmanın rəhbərliyində də çoxlu boşluqlar var. Sadaladığım məsələləri həll edərək Bakıya dönmək, bundan sonra heyətdəki çatışmazlıqları aradan qaldırmaq lazımdı. Kim nə deyir-desin, Mutulu “Neftçi” ən azı ötənilki nəticələri təkrarlamayaraq Azərbaycan premyer-liqasına daha da rəng qatacaq.

İLKİN SULTANLI