“Məncə, nəyisə dəyişməyə ehtiyac yoxdu. Çünki Danimarkadakı oyun “Sabah”ın həm üstün, həm də zəif tərəflərini göstərdi. Təbii ki, rəqibin də üstün və zəif cəhətləri üzə çıxdı. Dambrauskas və məşqçilər heyəti həmin oyunu yaxşı təhlil edib. Dəyişiklik etmək əvəzinə qoyulan tapşırığı, taktiki planı sona qədər yerinə yetirmək lazım gələcək. Məncə, Bakıda düşünülmüş şəkildə ilk oyunun davamını görməliyik. Sadəcə, orda buraxdığımız səhvləri təkrarlamamalıyıq. Hesab edirəm ki, “Sabah”ın strategiya baxımından ciddi bir səhvi yox idi. Yəni “düzgün mövqe seçmədilər”, “geridə oturmalıydılar, amma irəli çıxdılar” deyə biləcəyimiz səhvlər olmadı. Ona görə Bakıda da ilk oyunun davamını oynayacaqlar. Bununla belə, bir qədər ehtiyatlı olmalıdılar. İlk növbədə rəqibə pressinq edərkən diqqətli olmaq lazımdı. Çünki orda pressinq zamanı iki yarımmüdafiəçimiz də önə çıxırdı. Nəticədə istər-istəməz rəqib xətlər arasında rahat şəkildə açılır və bizə çətin anlar yaşadırdı. Burda nəyisə dəyişməkdən çox bir qədər daha diqqətli olmaq lazımdı. Yarımmüdafiəçilər həddən artıq önə çıxmamalıdı. Rəqibin üstün tərəflərindən biri olan keçidlərinə də çox diqqət etməliyik. Çünki Bakıda topu geri qaytarmaq üçün daim rəqibə təzyiq göstərməliyik. Təzyiq isə oyunçu qüvvəsi hesabına yaranır. Yəni geridə olan oyunçulardan hansısa birini bir qədər önə çəkirsən. Amma önə çəkdiyin zaman müdafiədə boşluqlar yarana bilər. “Sabah”ın üstün tərəflərindən biri də cinah müdafiəçilərinin hücuma həddən artıq fəal dəstək verməsidi. Bu fəallıq sayəsində qol imkanları yaradırlar. Riskin qarşısını almaq üçün futbolçular rəqibin əks-hücumlarına düzgün reaksiya verməlidilər. O cümlədən, rəqibin standart vəziyyətlərində də diqqətli olmalıdılar. Birinci oyunda aut atışlarının nə qədər təhlükəli olduğu göründü. Künc zərbələri də birbaşa qol imkanı yarada biləcək vəziyyətlərdi. Buna da bir qədər diqqətli yanaşmaq lazımdı. Daha diqqətli və konsentrasiyalı oynamaq lazımdı. Məsələn, Danimarkada Solvetin mövqeyini ani tərk edib, həddən artıq önə çıxması bilavasitə qolla nəticələndi. Ona görə belə məqamlarda daha diqqətli olmalıyıq.

Rəqibimiz kiçik səhvlərdən istifadə etməyi bacarır. “Sabah” isə yetərincə effektli və təhlükəli hücumlar qurmağı bacarır. Xüsusilə cinah oyunçuları çox fəaldı. Ortada oynayan İsayev də, məsələn, belə ötürmələr etməyi bacaran futbolçudu.

Qol imkanlarımız kifayət qədər olacaq. Sadəcə, həmin imkanları reallaşdırmaq baxımından problemlər yaşayırıq. Mən bunu hər yerdə deyirəm: “Sabah” ilk iki mərhələdə bəlkə də bir mövsümə bəs edəcək qədər qol vəziyyəti yaradıb, amma bunlardan az istifadə edib. Bu oyun elə oyundu ki, həmin qol imkanlarından maksimum dərəcədə istifadə etməlidilər”.