"Orhus" Bakıda aparıcı futbolçusu Frederik Tinqager olmadan mübarizə aparmalı olacaq. Çünki təcrübəli müdafiəçi zədəlidi. Düzdü, baş məşqçi Yakob Poulsen komandasının səfər oyununa tam hazır olduğunu düşünür. Lakin Tinqagerin yoxluğu Danimarka çempionu üçün böyük riskdi. Ancaq düşərgədən yaxşı xəbər də var. Belə ki, "Sabah"a qarşı ilk oyunda qıcolma ilə üzləşən, bu səbəbdən meydanı tərk edən Kolun Rösler artıq tam sağlamdı".

"Orhus"u Bakıda 175 azarkeş dəstəkləyəcək. Xatırlayırsızsa, Polşa "Lex"inə qarşı keçirilən səfər matçında tribunalarda 2100 tərəfdar yer almışdı. Ancaq nəzərə alaq ki, Poznana qədər məsafə az idi. Orhusdan Azərbaycanın paytaxtına kimi məsafə isə 4343 kilometrdi. Bu yolu təyyarə ilə 7-8 saata qət etmək mümkündü. Klubun direktoru Ceykob Nilsen deyir ki, 175 tərəfdarın belə ağır səfərə yollanması dəlilik, fantastik və unikal hadisədi. O, inanır ki, oyunçular azarkeşlərin dəstəyini hiss edə biləcək. Həmçinin mərhələ adlasalar, növbəti rəqibin kimliyindən asılı olmayaraq, səfər matçına daha çox azarkeş gedəcək".

"Nəhayət, Kiyev "Dinamo"sunun futbolçusu Şola Oqundananın harda olduğu üzə çıxdı. Baş məşqçi İqor Kostyuk bu sualın cavabında bildirdi ki, nigeriyalı sol cinah oyunçusu zədəlidi və bu üzdən ondan istifadə edə bilmir. Odu ki, futbolçu "Qarabağ"la cavab matçında da meydanda olmayacaq. Bununla belə, iyulun 20-də zədələnən qapıçı Ruslan Neşeret də hələ meydana çıxa biləcək qədər hazır deyil. Bu səbəbdən son matçlarda şans qazanan Vyaçeslav Surkis isə özünü ən yaxşı tərəfdən göstərir. Bəli, o, bir neçə dəfə topu etibarlı şəkildə dayandıra bilməyib. Ancaq qəhrəmanlıq etdiyi epizodlar da gözümüzün önündədi. Böyük ehtimalla, "Tofiq Bəhramov"da da "çərçivə" Surkisə əmanət olunacaq".

"İqor Kostyuk "Qarabağ"la matçdan əvvəl hansı məsələlərə görə narahatdı? Cavabı: "Zəif oynadığımızı düşünmürəm. İstər hücum, istərsə də müdafiə xəttində fəalıq. Məni narahat edən yeganə məqam çoxlu qol vura bilməməyimizdi. Həmişə uşaqlara demişəm ki, şansın üzünə gülməsini arzulayırsansa, 100 faiz gücünü sərf etməlisən. Çünki tarixdə nəticə qalır. Bizi oyun tərzimizə görə qınayanlara yalnız bunu deyə bilərəm. Bir məsələyə aydınlıq gətirim. Aleksandr Pixalenokun mikrozədəsi var. Bu üzdən ona çox şans verə bilmirəm. "Qarabağ"a qarşı ilk oyunda yaxşı oynadıq. Amma rəqib də pis oynamadı. Səfərdə də yaxşı nəticə əldə etmək istəyirik. Hesabda öndəyiksə, Bakıda bunu məntiqi sonluğa çatdırmalıyıq".