Sərdar Azmun Türkiyədə oynamağın əleyhinə deyil
Rusiyada ulduzu parladıqdan sonra “Bayer-04”ə transfer olunan, amma Almaniyada məhsuldarlığı zəif olan Sərdar Azmun “Tivibuspor” kanalına açıqlamalar verib.
"Football-plus.az" xəbər verir ki, İran yığmasının 28 yaşlı forvardı ötən mövsüm leverkuzenlilərin heyətində 31 oyuna cəmi 4 dəfə fərqlənə bildi. Uşaqlıqdan “Fənərbaxça” azarkeşi olduğunu bildirən Azmun bunları deyib:
“İranlı olduğum üçün türk dilində danışa bilirəm. Həm də türk filmlərinə, seriallarına baxıram. Bu da dili bilməyimə yardım edir. “Bayer-04” üçün ötən mövsüm yaxşı keçdi. İddialı və gənc heyətimiz var. Avropa Liqasında yarımfinala qədər irəliləməyimiz bizim üçün də yaxşı mənada sürpriz oldu. Bəxtimiz gətirsə, finala da yüksələ bilərdik. Xabi Alonso ilk gündən bizimlə məşqçi kimi yox, ata kimi davranmağa başladı. Köməkçiləri ilə birlikdə işinin öhdəsindən çox yaxşı gəlir. Ötən mövsüm Türkiyədən təklif almışdım. Ad açıqlamaq istəmirəm, amma böyük klublardan biri idi. Türkiyə mədəniyyətini çox sevirəm. Türkiyə çempionatında oynamaq gözəl olardı. Amma həmin vaxt bu transfer baş tutmadı. Ortada imza yoxdusa, deməli, transfer baş tutmayıb. “Fənərbaxça” ilə “Real” ən çox sevdiyim klublardı. Amma bu o demək deyil ki, İspaniyada “Real”dan başqa klubda oynamaram. Karyeram üçün ən yaxşı seçimi etmək və motivasiyamın ən yüksək səviyyədə olacağı bir klubda oynamaq istəyirəm. Uşaqlıqdan “Fənərbaxça” azarkeşiyəm. Türkiyənin hər 3 nəhəgində oynamağı hər futbolçu istəyər. Futbolda hər şey mümkündü. Biz peşəkarıq. İlk növbədə şərtlərə baxmaq lazımdı. Səudiyyə Ərəbistanından da maraqlananlar var. Amma müqavilə ilə “Bayer-04”ə məxsusam. Ona görə də nə olacağını bilmirəm. Əli Koçla dost münasibətindəyəm. Amma dostluq və peşəkarlıq fərqli şeylərdi. Təkcə “Fənərbaxça”nı nəzərdə tutmuram. Ümumiyyətlə, Türkiyədə oynamaq karyeram baxımından heç də pis variant olmazdı. Arda Gülər əla oyunçudu. Türkiyədə çox sevilir. Hazırda Türkiyənin ən istedadlı oyunçusudu. Düzgün yolla irəliləyir. “Real” və “Barselona” kimi klubların maraq dairəsindədi. Ümid edirəm ki, onun üçün işlər qaydasında gedəcək”.
ƏLİ
Digər xəbərlər
