UEFA rusiyalıları növbəti dəfə məyus edib. Qitə futbol təşkilatı 2026/27 mövsümü üçün avrokubokların iştirakçılarının siyahısını açıqlayıb.

"Football-plus.az" xəbər verir ki, Rusiya klublarına verilən sanksiya qüvvədə qalıb.

Qurumun sənədlərində bildirilib ki, İcraiyyə Komitəsinin Rusiya milli komandaları və klublarının UEFA-nın turnirlərindən kənarlaşdırılması ilə bağlı qadağasının davam etməsinə görə iştirakçıların yeni mövsüm üçün siyahısına dəyişiklik edilib. Eyni zamanda siyahı yarışların nəticələrinə və vəsiqə sayının yenidən bölüşdürülməsinə uyğun şəkildə yenilənib. Beləliklə, Rusiya təmsilçiləri 2026/27 mövsümündə də Çempionlar Liqası, Avropa Liqası və Konfrans Liqasında çıxış etməyəcəklər.

Xatırladaq ki, Ukraynaya hərbi müdaxilədən sonra Rusiyanın klubları və yığmaları 2022-ci ilin fevralından UEFA və FİFA-nın bayrağı altında keçirilən turnirlərdən qeyri-müəyyən müddətə kənarlaşdırılıb.

Maraq üçün onu da qeyd edək ki, Rusiya son mövsümün yekunlarına əsasən UEFA-nın əmsallar cədvəlində 22,632 əmsalla 28-ci yeri tutub və nəzəri cəhətdən avrokuboklara 4 klub göndərmək hüququ qazanıb. Lakin şimal qonşularımız sanksiyanın qüvvədə qalması səbəbindən qitə kuboklarında iştirak hüququndan istifadə edə bilməyəcəklər.